Pas sekuestrimit të 26.5 milionë eurove pasuri në kuadër të operacionit “Fortesa”, hetuesit po hetojnë detaje të reja mbi mënyrën se si 45-vjeçari Kristian Koni, i dënuar nga drejtësia italiane për vrasje dhe trafik droge, ka transferuar dhe investuar fonde në pasuri të paluajtshme luksoze në Shqipëri.
Sipas dokumentacionit të mbledhura nga strukturat hetimore dhe materialeve proceduriale të referuara Prokurorisë së Tiranës, Koni rezulton të ketë blerë një vilë rezidenciale në zonën e Mulletit, pjesë e kompleksit “Rolling Hills 2”, e njohur si “Vila nr. 2-B”. Objekti trekatësh ka sipërfaqe ndërtimi 391.1 m² dhe përfshin pishinë.
Hetimet kanë zbuluar se pasuria është siguruar përmes kontratave të dyshimta dhe me një çmim shumë më të ulët se ai i vlerës së tregut.
Fillimisht, vila ishte porositur nga shtetasi Vesel Demiraj për 808,000 euro, por kontrata u revokua pas mosplotësimit të pagesave. Më pas, e njëjta vilë u përvetësua nga shoqëria “Kriol.Al” sh.p.k., e administruar nga Koni, me çmim prej vetëm 300,000 eurosh.
Pagesa ishte e strukturuar me një këst fillestar prej 202,000 eurosh, ndërsa pjesa tjetër nuk ishte e përcaktuar në kontratë, duke ngritur dyshime të forta për pastrim parash. Diferenca e konsiderueshme mes vlerës reale dhe çmimit të rënë dakord është një nga elementët kryesorë që ka ndezur alarmin e hetuesve.
Nga materialet që disponojnë hetuesit rezulton se transaksioni ishte i kryer nëpërmjet kontratave premtim-shitjeje, një praktikë që mund të maskojë lëvizje të parregullta të fondeve. Përveç kësaj, janë identifikuar edhe transaksione të tjera të ngjashme, të cilat po analizohen për të zbuluar pasuri të tjera të fituara në mënyrë të dyshimtë.
Hetuesit po shqyrtojnë gjithashtu marrëdhëniet mes Koni dhe shoqërive të tjera të cilat kanë rezultuar në regjistrimet e pasurive të paluajtshme, si dhe aktivitetet e mundshme të tjera kriminale që mund të lidhen me pastrimin e parave. Materiali procedurial tashmë i është referuar Prokurorisë së Tiranës për veprime të mëtejshme.
Ky rast thekson mënyrën se si fonde të fituara në mënyra të paligjshme mund të depërtojnë në tregun e pasurive të paluajtshme, duke ngritur shqetësime për transparencën dhe monitorimin e transaksioneve luksoze në vend./Versus.al
