Lezhë- Anija “Libra” me 8 emigrantë nga Bangladeshi dhe Egjipti në bord ka mbërritur në portin e Shëngjinit mëngjesin e sotëm. Ankorimi i saj pritet të bëhet rreth orës 08:00, ndërsa më pas emigrantët do t’u nënshtrohen procedurave në qendrën pritëse dhe më pas do të transportohen drejt kampit të Gjadrit, të ngritur në bazë të marrëveshjes Shqipëri-Itali për strehimin e emigrantëve të paligjshëm.
Marrëveshja për emigrantët, ka ngjallur debate të shumta në Itali së fundmi dhe përplasje mes institucioneve pasi gjykatat italiane kanë bërë ndërhyrje në listën e vendeve të sigurta prej të cilave lejohet mbërritja e emigrantëve në Shqipëri. Shumë politikanë italianë e kanë konsideruar si të kushtueshme dhe të padobishme marrëveshjen për menaxhimin e fluksit të emigrantëve, duke e argumentuar këtë me numrin e ulët të tyre që po transportohen me anije drejt kampit të Gjadrit.
16 emigrantët e mbërritur herën e parë në Shëngjin u kthyen mbrapsht me vendim të gjykatës italiane. Disa prej tyre ishin të mitur, ndërsa të tjerë të cilët vinin nga Egjipti u kthyen mbrapsht pas përjashtimit të shtetit afrikan nga lista e vendeve të sigurta.
Kampi i ngritur në Gjadër është nën juridiksionin italian. Për sa kohë të zgjasë marrëveshja e parashikuar për 5 vite, çdo gjë që ndodh brenda kampit është përgjegjësi e personelit italian që tashmë është vendosur në Shqipëri prej disa muajsh për të bërë të mundur menaxhimin e qendrave. Versus.al
