Fatjon Bushgjoka e Petrit Çakrri, dy të arrestuarit sit ë dyshuar për vrasjen e 23 vjeçarit Renis Dobra i cili u gjet i vrarë më 9 korrik në Mat, kanë mohuar të kenë lidhje me krimin.
Bushgjoka, i cili dyshohet si autor së bashkë me dy vëllezërit e tij të shpallur në kërkim Kristi e Aleksandër Bushgjoka, ka pranuar se e njihte viktimën dhe se kishte patur më herët konflikte me të për trafikun e drogës në Gjermani, krim për të cilin tha se kishin bashkëpunuar.
Por gjatë dëshmisë së tij, ka mohuar që të ketë lidhje me vrasjen e të riut.
Nga ana tjetër, i arrestuari Petrit Çakrri i cili njihet si një prej dëshmitarëve okularë të vrasjes së ish-deputetit të PD Azem Hajdari tha se mes tre vëllezërve nga Tropoja njihet vetëm me Kristi Bushgjokën me të cilin tha se kishte qenë në një burg.
Në dëshminë e dhënë Çakrri tha se kishin shkuar me dy makina në zonë pasi vëllezërit i kishin thënë se do të kërkonin një sasi droge në fshatra, duke mohuar të ketë dijeni për vrasjen e të riut Dobra.
“Ishim me dy makina, më thanë të hipi në një makinë dhe të iki. Nuk kam dijeni se çfarë ndodhi me Dobrën”- mësohet të jetë shprehur Çakrri mes të tjerash. Versus.al
