Mund të ishte kthyer në një tragjedi. Një 48 vjeçar në Taranto të Italisë ka lyer me benzinë dhe ishte gati t'i vinte flakën me çakmak ish-gruas dhe ish-vjehrrit. Policia e ndaloi burrin (emri i të cilit nuk është bërë i ditur) ndërsa me çakmak në dorë kërcënoi se do t’i vërë zjarrin ish-it dhe babait të saj. 48-vjeçari u arrestua në orët e vona të mbrëmjes së të martes në Crispiano (Taranto) për përndjekje dhe tentativë për zjarrvënie.
Ishte gruaja që nisi mesazhin SOS. Ajo telefonoi 112 duke thënë se ish-burri i saj i kishte shkuar në shtëpi dhe po kërcënonte se do t’i vinte flakën. Kur mbërriti policia, gruas dhe babait të saj ju ishte hedhur mbi rroba bidoni me benzinë.
Ish-burrii mbante një çakmak në dorë, ndërsa ish-vjehrri po përpiqej ta “çarmatoste”. Vetëm ndërhyrja e policisë parandaloi më të keqen që ishte një hap larg. 48-vjeçari u vu në pranga, ndërsa gruaja dhe babai i saj u shpëtuan. Nga hetimet e para rezulton se edhe shtëpia dhe makina ishin lyer me lëndën e djegshme.
