Dogana franceze ka sekuestruar mbi një ton kokainë që po transportohej drejt Antwerp-it, në një operacion të madh antidrogë që autoritetet e cilësojnë si një goditje të rëndë ndaj trafikut ndërkombëtar të drogës në Evropë.
Sasia prej 1,145 kilogramë kokainë u zbulua e fshehur në një kamion të ngarkuar me thasë dheu për bimë, i cili ishte nisur nga Portugalia dhe ishte në rrugë drejt qytetit portual të Antwerp. Kamioni u ndalua nga doganierët në pikën e pagesës në Vienne, në jug të Lyon.
Detaji që zbuloi gjithçka
Sipas autoriteteve, dyshimet e para lindën kur doganierët vunë re se në kabinën e kamionit ndodheshin dy shoferë, një situatë e pazakontë për këtë lloj transporti. Gjatë kontrollit, ata zbuluan edhe një person të tretë të fshehur në kamion.
Të tre personat u arrestuan dhe u paraqitën para drejtësisë. Dy prej tyre kishin dokumente identiteti belge, ndërsa njëri rezultonte i kërkuar në Turqi për trafik droge.
998 pako kokainë të fshehura në dhe
Pas kontrollit të ngarkesës, autoritetet zbuluan se në mesin e thasëve me dhe ishin fshehur 998 pako kokainë. Kamioni u dërgua në një zonë të sigurt dhe u deshën disa orë kontroll për të nxjerrë të gjithë drogën, e cila ishte e shpërndarë në 22 thasë nga 500 kilogramë dhe.
Pastërti rekord dhe vlerë marramendëse
Sipas analizave laboratorike, kokaina kishte një nivel pastërtie shumë të lartë, nga 69% deri në 89%, çka konsiderohet e jashtëzakonshme.
Vlera fillestare e drogës llogaritet rreth 75 milionë euro, por autoritetet besojnë se në treg ajo mund të arrinte deri në 225 milionë euro.
Autoritetet theksojnë se kjo sasi ishte pjesë e trafikut të madh të drogës që kalon në aksin Portugali – Spanjë – Francë – Belgjikë, për të furnizuar portet dhe qytetet e mëdha të Evropës Veriore, një fenomen që policia e quan tashmë “tsunami i bardhë” për shkak të përmasave të trafikut të kokainës. /VERSUS
