Policia e Himarës ka ndërhyrë për të parandaluar një ngjarje të rëndë familjare, ku një 35-vjeçar kishte mbajtur peng prindërit e tij në banesë nën kërcënimin e një mjeti prerës.
Ngjarja ka ndodhur në Himarë, ku shtetasi Spiro Dhimaleksi, në gjendje të rënduar psikologjike, kishte izoluar në një dhomë prindërit e tij 60 dhe 65 vjeç, duke i kërcënuar me thikë se do t’i vriste.
Menjëherë pas njoftimit, forcat e policisë kanë mbërritur në vendngjarje dhe kanë nisur negociatat me 35-vjeçarin. Pas më shumë se një ore bisedimesh, një efektiv policie, banor i zonës, ka arritur të komunikojë drejtpërdrejt me të, duke ndikuar në uljen e tensionit.
Në momentin e ndërhyrjes, autori ka tentuar të dëmtojë veten me mjetin prerës, duke shkaktuar plagë në zonën e barkut. Policia ka ndërhyrë menjëherë duke e neutralizuar dhe duke i hequr mjetin, duke bërë të mundur shpëtimin e prindërve pa lëndime.
Më pas, ai është shoqëruar fillimisht në Komisariatin e Policisë Himarë dhe më tej në Vlorë, ku ka marrë ndihmën mjekësore në spitalin rajonal dhe është referuar për trajtim në shërbimet psikiatrike.
Prindërit e tij janë marrë në pyetje nga autoritetet për të sqaruar rrethanat e plota të ngjarjes, ndërsa policia vlerëson se ndërhyrja profesionale ka shmangur një tragjedi të mundshme./Versus.al
