Grekët nuk i kanë kapërdirë festimet e shqiptarëve në mes të Athinë, në shkallët e parlamentit grek, për Ditën e Flamurit.
Një nga mediat online në Greqi ka bërë dhe një shkrim plot me nota racizmi për shqiptarët, duke u kujtuar edhe bukën që hanë në vendin fqinj, edhe pse shqiptarët e hanë atë bukë, duke e paguar me punën e tyre,
Gazeta Newsbomb.gr që ka publikuar shkrimin racist dhe gati-gati poshtërrues për shqiptarët që festuan Ditën e Pavarësisë, njihet për qëndrimet anti-shqiptare, pretendon se shqiptarët ishin organizuar për këtë manifestim, që siç shkruan, vjen vetëm pak kohë pas arrestimit të Fredi Belerit dhe mitingjeve të Edi Ramës në Greqi.
Më tej, në artikull thuhet se nëse grekët do të kishin festuar në Shqipëri, do të ishin tërhequr zvarrë me dhunë. Një tjetër e pavërtetë, e një realiteti që të gjithë e njohim. Shqipëria ka toleruar edhe shfaqje më të ulëta raciste brenda territorit të saj.
Artikulli pretendon se të rinjtë shqiptarë thirrën “UÇK” dhe “Shqipëri Etnike”, çka është e pavërtetë, por edhe nëse do të kishin thirrur për Ushtrinë Çlirimtare të Kosovës, sërish nuk ka asnjë element ekstremist. UÇK është një ushtri legjitime që historia i ka dhënë vendin e lavdishëm që meriton.
Gazeta greke pretendon se të rinjtë shqiptarë “prishën imazhin” sepse në atë moment po ndizeshin dritat e bredhit përpara Parlamentit grek.
Më tej, festa e shqiptarëve quhet si “propagandë” e mirëmenduar e Shqipërisë. Artikulli mbyllet me dy fjali që edhe nazistët e Hitlerit do të mendoheshin dy herë t’i shkruanin.
“Nuk e respektojnë as bukën që hanin e hanë në Greqi! Fjala turp nuk mjafton për të përshkruar imazhet specifike dhe tolerancën e propagandës së zezë të shqiptarëve”, përfundon artikulli.
Më poshtë po sjellim artikullin e plotë të medias greke:
Skena që provokojnë grekët dhe shpërqendrojnë vendin janë shpalosur në sheshin Sintagma në eventin e ndezjes së pemës së Krishtlindjes.
Po të bëhej diçka e tillë nga grekët në Shqipëri, të gjithë do të arrestoheshin dhe do të futeshin në burg pa u gjykuar... Këtu në Greqi ne i biem indiferent bilbilit...
Skenat që u zhvilluan mbrëmjen e së enjtes në sheshin Sintagma janë të paimagjinueshme.
Grupe të organizuara shqiptarësh që jetojnë në Greqi mbërritën me makinat e tyre në Sintagma, teksa valëvitnin flamujt shqiptarë nga dritaret e tyre gjatë gjithë rrugës!
Me të mbërritur në Sintagma, ata u ngjitën në pjesën e sipërme të sheshit, përballë Parlamentit Helen, shpalosën flamujt e tyre dhe brohoritën parulla për... Kombin e tyre.
Vihet re se në të njëjtën kohë është ndezur pema e Krishtlindjeve në sheshin Sintagma me shqiptarët që përpiqen të mbulojnë muzikën me zërin e tyre. Madje, ata arritën deri aty sa të thërrisnin edhe parulla për UÇK-në, ndërsa mes tyre kishte edhe më provokues që valëvitnin pankarta me... Shqipërinë e Madhe!
Kujtohet se më 28 nëntor 1912 u nënshkrua shpallja e pavarësisë së Shqipërisë nga Perandoria Osmane.
Siç shihet në videot e postuara në TikTok, shqiptarët mbanin në duar flamuj, të veshur me këmisha me stemën kombëtare dhe duke kënduar himne tradicionale të atdheut të tyre me sloganet “Shqipëria e Madhe”.
Në periudhën e fundit, si me burgosjen e Fredi Belerit, ashtu edhe me festat e Edi Ramës në Galatsi dhe Selanik, shqiptarët po tregojnë një provokim agresiv të paparë ndaj Greqisë.
Do të thuash që gjejnë dhe bëjnë... Sepse po të ishte shtet serioz, nuk do të lejonte një propagandë të tillë para Kuvendit të Greqisë dhe monumentit të Ushtarit të Panjohur.
Nuk e respektojnë as bukën që hanin e hanë në Greqi!
Fjala turp nuk mjafton për të përshkruar imazhet specifike dhe tolerancën e propagandës së zezë të shqiptarëve.
