Policia e Tiranës ka nisur hetime ndaj 15 personave, organizatorë dhe pjesëmarrës në protestat që po zhvillohen prej ditësh në kryeqytet.
Sipas njoftimit zyrtar, procedimet lidhen me organizimin dhe pjesëmarrjen në grumbullime e manifestime të paligjshme, prishjen e rendit dhe qetësisë publike, si dhe pengimin e qarkullimit të mjeteve të transportit.
Policia sqaron se gjatë tubimeve janë bllokuar disa akse kryesore të Tiranës, përfshirë Rrugën e Elbasanit, zonën e 9-Katësheve, ish-Bllokun dhe segmente të Unazës. Sipas saj, është tejkaluar edhe orari dhe perimetri i lëvizjes së përcaktuar për protestën.
Autoritetet vijojnë veprimet procedurale dhe materialet i janë referuar Prokurorisë për vlerësim të mëtejshëm.
Reagimi i Policisë
Tiranë-Procedohen penalisht 15 shtetas për organizim dhe pjesëmarrje në grumbullime e manifestime të paligjshme, prishje të rendit dhe qetësisë publike, si dhe pengim të qarkullimit të mjeteve të transportit.
Në vijim të veprimeve procedurale të kryera në lidhje me tubimin e zhvilluar në Tiranë, strukturat e Policisë së Tiranës proceduan penalisht 15 shtetas, konkretisht:
A. G., G. P., A. T., D. G., L. K., E. S., A. K., E. L., V. D., G. K., A. P., Dh. C., A. B., L. G. dhe F. K., të dyshuar për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Prishja e rendit dhe qetësisë publike” dhe “Pengimi i qarkullimit të mjeteve të transportit”.
Nga veprimet hetimore rezultoi se tubimi, i njoftuar për t’u zhvilluar në intervalin kohor nga ora 19:00 deri në orën 22:00, në Sheshin “Skënderbej” dhe në bulevardin “Dëshmorët e Kombit”, vijoi në disa akse rrugore të kryeqytetit, konkretisht në Rrugën e Elbasanit, zonën e 9-Katësheve, ish-Bllok dhe segmente të Unazës, ku u bllokua qarkullimi i automjeteve, në tejkalim të orarit dhe perimetrit të lëvizjes të njoftuar zyrtarisht.
Në cilësinë e provës materiale u sekuestruan një automjet dhe 2 aparate celularë.
Materialet procedurale iu referuan Prokurorisë, për veprime të mëtejshme.Versus.al
