Një 40-vjeçar ka përfunduar në pranga pasi u kap në flagrancë duke shpërndarë kokainë dhe kanabis në zona rurale të bashkisë Vau i Dejës, pikërisht aty ku zakonisht qetësia prishet vetëm nga ndonjë lopë që ka dalë nga gardhi.
Sipas Policisë së Shkodrës, operacioni u zhvillua nga specialistët për Hetimin e Narkotikëve, të cilët goditën një tjetër rast të shpërndarjes së drogës në doza. Në pranga ra shtetasi K. D., 40 vjeç, banues në fshatin Naraç.
Ky “biznesmen lokal” i narkotikëve u ndalua në fshatin Laç, teksa qarkullonte me automjetin e tij, i cili për pak nuk u kthye në furgon delivery për doza kokainë dhe kanabis. Gjatë kontrollit, efektivët zbuluan lëndët narkotike që ai mbante me vete, të destinuara për shitje në porcione të vogla – paketim popullor me përfitim maksimal.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Shkodër. Versus.al
