Maqedoni e Veriut- Disa zjarrvënie të qëllimshme janë regjistruar gjatë orëve të para të mëngjesit të sotëm në Kumanovë ku i është vënë flaka një lokali në pronësi të këshilltarit komunal Fitor Jakupi.
Ndërsa pak metra më lart, i është vënë flaka edhe makinës së prokurorit shqiptar Xhelal Bajrami. Një tentativë për djegien e makinës është bërë edhe ndaj kolonelit E.D por mjeti i këtij të fundit është përfshirë vetëm pak nga flakët dhe pa pasojë të rënda.
Ndërkohë për ngjarjet e ndodhura, ka patur edhe një komunikatë të jashtëzakonshme nga Bashkimi Demokratik për Integrim (BDI) ku theksohet se ngjarjet e ndodhura ndaj pronave të shqiptarëve dëshmojnë frymën e urrejtjes ndëretnike të përhapur nga qeveria aktuale.
Në deklaratë thuhet se kriza po përkeqësohet çdo ditë e më shumë dhe se duhet ndërhyrje urgjente edhe nga ndërkombëtarët.
Reagimi i plotë:
Ngjarjet e rënda që ndodhën mbrëmë në Kumanovë, ku disa makina dhe një dyqan të shqiptarëve u dogjën, janë dëshmi e hidhur e frymës së urrejtjes dhe ndasive ndëretnike që kjo qeveri jolegjitime ka krijuar. Kjo nuk është më vetëm papërgjegjshmëri apo dështim – kjo është një krizë e rrezikshme që po përkeqësohet çdo ditë.
Kur qeveria nuk arrin të garantojë sigurinë e qytetarëve të saj dhe kur institucionet heshtin përpara veprimeve të tilla të urrejtjes, mesazhi që dërgohet është i qartë: shqiptarët në këtë vend janë të lënë në mëshirën e fatit. Kjo qasje nuk është vetëm diskriminuese, por edhe thellësisht destabilizuese për të gjithë shoqërinë.
Bashkimi Demokratik për Integrim bën thirrje për ndërhyrje urgjente nga faktori ndërkombëtar. Qartë është bërë e ditur se nga kjo qeveri e verbuar dhe e njëanshme nuk mund të presim as drejtësi dhe as përgjegjësi. Vetëm një presion ndërkombëtar mund të ndalojë këtë spirale të rrezikshme të dhunës dhe urrejtjes, e cila po kërcënon paqen dhe stabilitetin në vend.
Ne kërkojmë që këto sulme të hetohen menjëherë dhe autorët të sillen para drejtësisë. Çdo ditë vonesë është një ftesë për ata që përhapin urrejtje për të vazhduar me aktet e tyre të turpshme. Shqiptarët nuk do të qëndrojnë më të heshtur përballë kësaj padrejtësie, dhe ne do të përdorim çdo mjet demokratik për të mbrojtur të drejtat dhe dinjitetin e qytetarëve tanë.
Bashkimi Demokratik për Integrim do të vazhdojë të jetë zëri i shqiptarëve dhe mbrojtës i paqes dhe stabilitetit në këtë vend. Por qartazi, kjo luftë për drejtësi dhe barazi nuk mund të vazhdojë vetëm. Faktori ndërkombëtar duhet të reagojë tani, para se kjo urrejtje të marrë përmasa edhe më të rrezikshme.
Situata në Maqedoninë e Veriut mes shqiptarëve dhe maqedonasve është bërë gjithmonë e më e ashpër që prej nisjes së diskutimeve nëse gjuha shqipe është apo jo gjuhë zyrtare në këtë shtet. Versus.al
