Tiranë- Detaje të reja janë zbardhur lidhur me shpërthimin e ndodhur më 21 dhjetor në rrugën “Sadik Petrela” ku u vendos tritol në ballkonin e një apartamenti në katin e nëntë.
Siç u raportua më herët, apartamenti ishte marrë me qira nga Elena Arza, por brenda u gjetën dokumente identifikimi të Bernard Sinomatit, vëllait të Sokol Sinomatit të njohur ndryshe në Vlorë si “buzëderri”.
Lënda plasëse është vendosur me dron dhe objektiv i shpërthimit ka qenë Bernard Sinomati i cili në momentin e ngjarjes nuk ka qenë në banesë. Aktualisht as Sinomati dhe as Arza nuk janë gjetur nga policia për t’u marrë dëshmitë. Ndërkohë as autorët e ngjarjes nuk janë identifikuar.
Dyshohet se ngjarja ka ndodhur në vazhdën e larjes së hesapeve mes grupeve rivale pasi më 7 janar të këtij viti u ekzekutua me snajper Gëzim Sinomati, djali i Sokol Sinomatit.
Sërish objektivi i atentatit kishte qenë Bernard Sinomati dhe jo 23 vjeçari që u vra.
Kush është Sokol Sinomati?
I njohur ndryshe si "Buzëderri", babai i të riut Gëzim Sinimati, i cili u ekzekutua me snajper në janar në Vlorë, atentat akoma i pazbardhur, është një nga personat që përfitoi nga amnistia penale, duke përfituar lirinë në 24 prill 2024.
Ish-anëtari i bandës së Vlorës në ’97-ën, ka vuajtur dënimin për vrasjen e shtetasit Elton Tato, si dhe plagosjen e Robert Borakut, ngjarje këto të ndodhur në vitin 2002.
Sokol Sinomati njihej gjithashtu dhe si ushtar i grupit të Gaxhait, megjithatë Gjykata e Lartë për këtë akuzë e ka gjetur atë fajtor vetëm për vjedhje me dhunë, dhe jo pjesëmarrje në bandë të armatosur. Versus.al
