Britani e Madhe- Një shqiptar i dënuar me 32 vite burg për vrasje ka arritur së fundmi të mbledhë shumën prej 101 mijë eurosh nëpërmjet thirrjeve të bëra ndaj ndjekësve të tij në rrjetin social TikTok.
I riu Eugert Merizaj i njohur me pseudonimin “Babale” mësohet se u përfshi në thirrjet për të ndihmuar një vajzë shqiptare 13 vjeçare e cila po përballet me një problem të madh shëndetësor. E mitura e cila jeton në një fshat të thellë të Skraparit, jeton me babain, gjyshërit dhe tre motrat. Ajo u diagnostikua me zmadhim të mëlçisë dhe hypertension portal. Gjendja e saj shëndetësore u përkeqësua me kalimin e kohës dhe në Shqipëri nuk ofrohet trajtimi i nevojshëm për të, duke e bërë të domosdoshme ndërhyrjen mjekësore jashtë vendit.
Familja e saj është drejtuar për ndihmë jashtë Shqipërisë dhe ka gjetur shpresë në një spital në Turqi. Mjeku ka përcaktuar se Brikena ka nevojë për dy ndërhyrje madhore. Për këto ndërhyrje duheshin 80.000 po u mblodhën mbi 100.000 euro”.
Merizaj ndikoi në mbledhjen e kësaj shume parash pavarësisht se ndodhet në burg i dënuar si pjesë e një grupi shqiptarësh të cilët ekzekutuan rivalin e tyre në fushën e prodhimit dhe shitjes së drogës, ish-snajperistin Kurd Ali Hussein, ngjarje e ndodhur në shtator të 2019-ës. Me të kryer krimin, Merizaj u largua drejt Belgjikës, por u kap dhe u ekstradua për në Angli ku po vuan dënimin dhe shpesh herë është bërë diskutim në mediat vendase për faktin se arrin të përdorë lehtësisht rrjetet sociale edhe pse brenda burgut. Versus.al
