Kishin ardhur nga "fundi i botës" për të ushtruar prostitucion në Shqipëri...
Një operacion i koordinuar i Policisë së Durrësit ka tronditur qytetin, duke zbuluar dy apartamente që shërbenin si qendra të fshehta të prostitucionit në zonat e Vollgës dhe Plazhit.
Në pranga përfundoi një shtetase nga Armenia, e identifikuar si organizatore, ndërsa një shtetase nga Peruja u procedua penalisht për veprën e prostitucionit. Bashkë me to, përfshirë në hetime për të njëjtën vepër, u proceduan edhe tre shtetas shqiptarë.
Momentet e ndërhyrjes ishin dramatike: shtetaset e huaja refuzuan hapjen e dyerve, duke detyruar policinë të bashkëpunojë me punonjësit e Shërbimit Zjarrfikës për t’i hapur ato dhe për të ndërprerë aktivitetin e paligjshëm.
Gjatë kontrollit u sekuestruan dy pasaporta të shtetaseve të huaja, shuma parash, karta telefoni dhe blloqe shënimesh, elemente që konfirmojnë organizimin e aktivitetit të jashtëligjshëm.
Hetimet zbuluan se apartamentet në Vollgë (lagjja nr. 1) dhe Plazh (lagjja nr. 13) ishin përshtatur enkas për ushtrimin e prostitucionit, duke u shndërruar në një rrjet të fshehtë dhe të strukturuar.
Materialet procedurale janë dorëzuar pranë Prokurorisë së Durrësit, ndërsa hetimet vazhdojnë për zbardhjen e plotë të skemës dhe për kapjen e çdo bashkëpunëtori të mundshëm.
