Një përplasje e dhunshme mes tifozëve të futbollit dhe forcave të policisë ka tronditur Berlinin, duke lënë pas rreth 50 persona të plagosur, raportojnë mediat gjermane. Incidenti ndodhi në kuadër të ndeshjes së Kategorisë së Dytë gjermane mes Hertha BSC dhe Schalke 04, e zhvilluar të shtunën në Stadiumin Olimpik të Berlinit.
Sipas policisë, situata degradoi kur grupe tifozësh të maskuar sulmuan efektivët e rendit. Nga ana tjetër, tifozët pretendojnë se janë provokuar nga policia, duke ofruar një version krejtësisht të ndryshëm të ngjarjes.
Dhunë para nisjes së ndeshjes
Sipas gazetës Die Zeit, incidentet nisën para se të jepej bilbili i parë. Tifozë të ekipit vendas dyshohet se fyen dhe goditën policët, madje përdorën edhe barriera metalike kundër tyre. Policia reagoi duke përdorur spray me piper për të shpërndarë turmën.
Bilanci i përplasjes ishte i rëndë:
21 policë të plagosur
31 tifozë të lënduar
“Dhunë nuk ka vend në kulturën e futbollit,” deklaroi policia e Berlinit, duke theksuar se stadiumet që presin mijëra tifozë nuk mund të shndërrohen në strehë për akte dhune.
Versione të kundërta nga tifozët
Ndërkohë, tifozët e Hertha BSC japin një tjetër version të ngjarjes. Organizata e tifozëve Die Fanhilfe e cilëson ndërhyrjen e policisë si një “sulm masiv policor”.
“Që në hyrje, policia nuk respektoi marrëveshjet dhe provokoi tifozët,” thuhet në reagimin e organizatës, e cila pretendon gjithashtu se një person është arrestuar pa arsye të dukshme. Presidenti i klubit Hertha BSC, Peter Görlich, deklaroi se ngjarja do të hetohet në detaje, për të sqaruar përgjegjësitë dhe rrethanat e përplasjes.
