Prej ditësh është lajmëruar mbërritja ditën e sotme në portin e Durrësit, e anijes me mbetjet toksike e nisur disa javë më parë po nga Shqipëria për në Tajlandë. Por mësohet se anija do të ankorohet ditën e nesërme në mëngjes në port.
Pas një udhëtimi në disa porte të botës, ku asnjëri prej tyre nuk pranoi ngarkesën prej 100 kontenierësh me mbetje të rrezikshme, edhe Tajlanda refuzoi edhe pse sipas drejtuesve të anijes, duhej të shkarkohej aty.
Dërgesat po kthehen nga brigjet e Singaporit. Dyshohet se ngarkesa përmban pluhur toksik të furrës së çelikut. Kjo sasi dyshohet se doli nga Porti i Durrësit më 4 Korrik të këtij viti, me destinacion final Tajlandën dhe tranzit Singaporin.
Por fillimisht ngarkesa me mbi 800 tonë peshë, ndaloi në Itali për t’u ndarë në dy pjesë, në anijet e kompanisë ndërkombëtare “Maersk”; respektivisht “Compton” dhe “Candor”.
Për këtë arsye, ditën e sotme është organizuar edhe një protestë e opozitës dhe disa shoqatave të shoqërisë civile kundër mbetjeve të rrezikshme.
“Vapori i madh po kthehet me mbetje që në dukjen e parë ishin mbetje industriale, që mund të përdoreshin për qëllime të tjera. Por tani fakti që këto mbetje bënë një transport dhe ndaluan dhe u gjurmuan nga ambientalistët dhe u cilësuan si të papranueshme për destinacionin që kishin Tajlandën unë dyshoj që kemi të bëjmë me mbetje as toksike dhe as industriale, por shumë të rrezikshme”, u shpreh gjatë fjalës për mediat, ambientalisti Sazan Guri.
Në një njoftim të mëhershëm Partia Demokratike tha se protesta e sotme kundër mbetjeve të rrezikshme “synon sensibilizimin e opinionit publik dhe sigurimin e një procesi transparent për mbetjet e rrezikshme që kërcënojnë jetën dhe mjedisin tonë”.
Alarmi për tranportine mbetjeve toksike, ndezi debatin mes opozitës dhe qeverisë, ndërsa Prokuroria e Durrësit nisi në 21 gusht hetimet mbi çështjen e transportit të dhjetëra kontejnerëve me mbetje të rrezikshme që dyshohet se kanë dalë nga territori shqiptar drejt Tajlandës.
Prokuroria njoftoi se hetimet kanë nisur për tri akuza, "Kontrabandë me mallra të ndaluara ose të kufizuara”, “Shpërdorimi i detyrës” e “Transportimi i mbetjeve”.
