Tiranë- Një sasi e lëndës narkotike “cannabis sativa” e kultivuar vazo plastike në ambientet e një magazine të vjetër në Selitë është sekuestruar nga policia gjatë një operacioni të zhvilluar gjatë orëve të para të mëngjesit të sotëm.
Mësohet se në godinën e ndërtuar gjatë periudhës së komunizmit, në katin e dytë që ishte privatizuar nga A.C, K.K dhe V.S janë gjetur dhe sekuestruar 105 bimë kanabis sativa të cilat u sekuestruan në cilësinë e provës materiale. Ndërkohë që kati i parë është në pronësi të Ministrisë së Ekonomisë, Kulturës dhe Inovacionit.
Për këtë ngjarje, janë shoqëruar në polici 6 persona, ndërsa një grup hetimor është ngritur për të zbuluar detaje të reja mbi personat e përfshirë.
“Gjatë orëve të para të mëngjesit, shërbimet e Komisariatit të Policisë Nr. 2 kanë ndërhyrë në ambientet e një magazine të vjetër dykatëshe, në rrugën “Hamdi Pepa”, Selitë, ku nga informacionet e siguruara nga inteligjenca policore, dyshohej se kultivoheshin bimë narkotike, me anë të llambave.
Nga kontrollet, në katin e dytë të këtij objekti, i cili nga verifikimet rezulton i privatizuar nga shtetasit A. C., K. K. dhe V. S., shërbimet e Policisë gjetën të kultivuara në vazo plastike, 105 bimë të dyshuara narkotike Cannabis Sativa”- thuhet në njoftimin e publikuar. Versus.al
