Bota ka humbur sot një nga figurat më të dashura dhe më të respektuara të politikës globale. José Alberto “Pepe” Mujica Cordano, ish-president i Uruguait dhe simbol i thjeshtësisë dhe drejtësisë sociale, ka ndërruar jetë në moshën 89-vjeçare, pas një beteje të gjatë me kancerin në ezofag.
Lajmi i ndarjes nga jeta të Mujicës është konfirmuar nga familjarët dhe burime zyrtare në Montevideo. Mujica ka qenë president i Uruguait në periudhën 2010–2015 dhe është njohur gjerësisht për jetën e tij modeste, parimet e forta humaniste dhe angazhimin e vazhdueshëm për të drejtat e njeriut dhe barazinë sociale.
Ish-gueril i lëvizjes së majtë Tupamaros gjatë viteve të diktaturës ushtarake, Mujica kaloi më shumë se një dekadë në burg në rrethana ekstreme, para se të rikthehej në jetën politike dhe të zgjidhej deputet, më pas senator, dhe ministër i Bujqësisë e Blegtorisë. Më 30 nëntor 2009, ai fitoi zgjedhjet presidenciale, duke e drejtuar Uruguain me një stil të pashembullt të qeverisjes – me modestinë dhe ndershmërinë që do ta bënin një ikonë botërore.
Pepe Mujica jetonte në një fermë të thjeshtë në periferi të Montevideos, ngiste një Volkswagen “Buburrec” të vitit 1987, dhe dhuronte rreth 90% të pagës së tij presidenciale për qëllime bamirësie. Ai refuzoi të jetonte në pallatin presidencial dhe zgjodhi gjithmonë të mbetej pranë qytetarëve të zakonshëm, duke fituar nofkën “Presidenti më i varfër në botë”, të cilën ai e pranonte me përulësi.
Në vitin 2020, Mujica u tërhoq nga jeta politike aktive, duke dhënë dorëheqjen nga Senati dhe deklaruar se do t’i kushtonte kohë familjes dhe jetës private/Versus.al
