Një shpërthim automobili ka ndodhur në qytetin Balashikha, në lindje të Moskës, duke shkaktuar vdekjen e një gjenerali të lartë rus. Sipas Komitetit Hetimor të Rusisë, shpërthimi ka ndodhur rreth orës 10:40 të mëngjesit të së premtes, kur një Volkswagen Golf i mbushur me një pajisje shpërthyese improvizuar (IED) është aktivizuar teksa gjenerali Yaroslav Moskalik po kalonte pranë automjetit. Shpërthimi ka qenë aq i fuqishëm sa që trupi i tij është hedhur disa metra larg.
View this post on Instagram
Moskalik, 59 vjeç, ishte zëvendësdrejtor i Drejtorisë së Operacioneve të Përgjithshme të Shtabit të Përgjithshëm të Ushtrisë Ruse. Ai kishte marrë pjesë në bisedimet e vitit 2015 në kuadër të "formatit të Normandisë" për Ukrainën dhe ishte promovuar në gjeneral-lajtenant në vitin 2021. Hetuesit kanë nisur një hetim për vrasje dhe trafikim të lëndëve shpërthyese.
Ky atentat vjen pas një serie ngjarjesh të ngjashme, përfshirë vrasjen e gjeneralit Igor Kirillov në dhjetor 2024 dhe atentatin ndaj Darya Dugina në gusht 2022. Autoritetet ruse kanë dyshime se këto sulme janë realizuar nga shërbimet sekrete ukrainase, megjithëse Ukraina nuk ka komentuar ende për këtë ngjarje.
