Emri i operacionit të Izraelit kundër Iranit, "Rising Lion" (Luani që ngrihet), nuk është zgjedhur rastësisht.
Këtë e ka shpjeguar korrespondenti i Mediaset nga Izraeli, Elia Milani:
“Luani ishte simboli dhe ndodhej në flamurin e Iranit përpara revolucionit khomeinist të vitit 1979.”
Qëllimi, siç është shprehur disa herë nga Netanyahu, është rrëzimi i regjimit të ajatollahëve.
Kryeministri izraelit ka thënë disa herë:
“Ne nuk jemi kundër iranianëve, por kundër regjimit të ajatollahëve.”
Prandaj luani që ngrihet, emri i operacionit, ka një kuptim simbolik shumë të rëndësishëm në këtë drejtim.
Luani është i lidhur me monarkinë persiane, është simbol i forcës dhe guximit dhe shpesh lidhet me Aliun, kushëririn dhe dhëndrin e profetit Muhamed, i nderuar shumë në doktrinën shiite.
Kjo kafshë simbolizon gjithashtu sovranitetin mbretëror, pushtetin tokësor të mbretit (Shahut).
Në veçanti, në flamurin e vjetër të Iranit, luani shfaqet me diellin – një simbol i përdorur për shekuj me radhë, sidomos gjatë epokës së dinastisë Qajar (1789–1925) dhe më pas të Pahlavive (1925–1979), deri në Revolucionin Islamik të vitit 1979, që solli lindjen e Republikës Islamike.
Gjatë epokave Qajar dhe Pahlavi, ky simbol u bë një emblemë kombëtare, i pranishëm në flamur, në monedha dhe në ndërtesa qeveritare.
Me Revolucionin Islamik, simboli u hoq sepse konsiderohej i lidhur me monarkinë dhe me një të kaluar “të degjeneruar”, sipas ideologjisë së re.
Ai u zëvendësua me simbolin aktual të stilizuar të fjalës “Allah” në qendër të flamurit./Versus.al
