Pas sulmit ajror të forcave amerikane ndaj Iranit, Shtëpia e Bardhë publikoi disa fotografi nga brenda dhomës së situatave të emergjencës, ku Presidenti Donald Trump dhe këshilltarët e tij ndoqën në kohë reale operacionin e koduar “Çekani i Mesnatës”.
Sulmi u drejtua ndaj tre prej qendrave kryesore bërthamore të Iranit – Natanz, Isfahan dhe Fordow – të cilat, sipas Presidentit Trump, janë “shkatërruar plotësisht”, duke e cilësuar ndërhyrjen si një “sulm shumë të suksesshëm”.
Në një nga fotografitë më të komentuara nga brenda dhomës së operacioneve, Gjenerali Dan Caine, Kryetar i Shefave të Shtabit të Përbashkët, shfaqet duke bërë “shenjën e brirëve”, një gjest i cili sot lidhet me muzikën rock, por që historikisht ka qenë simbol mbrojtjeje ndaj së keqes në kultura mesdhetare.
Krahas Trump, në foto shihen edhe Sekretari i Mbrojtjes Pete Hegseth, Sekretari i Shtetit Marco Rubio, si dhe zyrtarë të tjerë të lartë të administratës amerikane.
Vendimi i Trump për të ndërhyrë ushtarakisht vjen pas ditësh diskutimesh intensive dhe pak përpara skadimit të një afati dyjavor që ai i kishte vendosur vetes për të reaguar pas përshkallëzimit të tensioneve mes Izraelit dhe Iranit, duke e futur kështu SHBA-në drejtpërdrejt në një nga përballjet më të rrezikshme në Lindjen e Mesme në vitet e fundit. /Versus.al/
