Greqi- Një ekzekutim brutal me karakteristika mafioze ka ndodhur pasditen e së enjtes në periferi të Athinës ku viktima është kreu i mafie greke Giorgos Moschouris.
Moschouris, i cili në jetën e natës njihej me pseudonimin “Thamnakias”, sapo kishte dalë nga qendra private diagnostike, kur disa persona ende të paidentifikuar nga policia dhe që ndodheshin një automjet i janë afruar dhe e kanë “qëlluar” me kallashnikov.
Ai u qëllua disa herë, disa prej të cilave e goditën në fytyrë, duke i shkaktuar vdekjen e menjëhershme, shkruajnë mediat greke.
Në vendin e vrasjes u gjetën shumë gëzhoja, ndërsa pak kohë më vonë pak metra më tutje vendit të ngjarjes u gjet një automjet i djegur i cili dyshohet se është makina e autorëve.
Policia greke po shqyrton seriozisht mundësinë e larjes së hesapeve brenda krimit të organizuar, pasi Moschouris i kishte mbijetuar një atentati në vitin 2020 në Voula, jashtë një pastiçerie të njohur.
Zona vijon të jetë e rrethuar, ndërsa hetimet për identifikimin dhe kapjen e autorëve janë duke u zhvilluar.
Policia greke ka sekuestruar pamjet e kamerave të sigurisë dhe deklaratat e dëshmitarëve të cilët ndodheshin aty në kohën kur u krye atentati mafioz. /Versus.al
