Administrata Trump njoftoi të premten se Shtetet e Bashkuara po hedhin poshtë amendamentet e miratuara në vitin 2024 nga shtetet anëtare të Organizatës Botërore të Shëndetësisë (OBSH) për të luftuar pandemitë, duke thënë se ato shkelin sovranitetin amerikan.
Në vitin 2024, shtetet anëtare të OBSH-së miratuan amendamente në Rregulloret Ndërkombëtare të Shëndetit, një kornizë ligjërisht e detyrueshme për trajtimin e emergjencave të shëndetit publik, pasi kufijtë e rregullave aktuale u ekspozuan gjatë pandemisë COVID-19.
Presidenti i SHBA-së, Donald Trump, vendosi që kur u rikthye në pushtet në janar, të tërhiqte Shtetet e Bashkuara nga agjencia e OKB-së. Megjithatë, sipas Departamentit të Shtetit të SHBA-së, këto amendamente mbeten të detyrueshme për vendin.
Sekretari i Shëndetësisë dhe Shërbimeve Njerëzore i SHBA-së, Robert Kennedy Jr., i njohur për qëndrimet e tij të rrethuara nga skepticizmi në lidhje me vaksinat, dhe Sekretari i Shtetit i vendit, Marco Rubio, vunë në dukje në një deklaratë se "këto amendamente ka të ngjarë të ndërhyjnë në të drejtën tonë sovrane për të formësuar politikën tonë shëndetësore".
"Ne do t'i vendosim amerikanët në radhë të parë në të gjitha veprimet tona dhe nuk do të tolerojmë asnjë politikë ndërkombëtare që shkel lirinë e fjalës, privatësinë ose liritë civile të amerikanëve", shtoi deklarata.
Amendamentet prezantojnë konceptin e një "emergjence pandemie" dhe "solidaritet dhe barazi më të madhe", sipas OBSH-së.
Ato u miratuan pasi organizata dështoi vitin e kaluar të arrinte një marrëveshje globale më ambicioze për të luftuar pandemitë. Në vitin 2025, më në fund u arrit një marrëveshje, por pa SHBA-në.
"Na vjen keq për vendimin e SHBA-së për të hedhur poshtë amendamentet", tha shefi i OBSH-së, Tedros Adhanom Ghebreyesus, në një deklaratë të postuar në mediat sociale.
Ai theksoi se amendamentet "janë të qarta për çështjen e sovranitetit të shteteve anëtare" dhe shtoi se OBSH-ja nuk mund të vendosë për karantinat ose masa të ngjashme.
Uashingtoni, nën presidencën e Joe Biden, kishte marrë pjesë në negociatat në vitin 2024, por nuk kishte arritur të arrinte një konsensus. SHBA-të kishin kërkuar më shumë mbrojtje të të drejtave të pronësisë intelektuale për vaksinat amerikane.
Paraardhësi i Rubios në Departamentin e Shtetit të SHBA-së, Anthony Blinken, më pas i kishte mirëpritur ndryshimet, duke thënë se ato përfaqësonin progres.
"Ato gjithashtu nuk e adresojnë në mënyrë të mjaftueshme cenueshmërinë e OBSH-së ndaj ndikimit politik dhe censurës, veçanërisht nga Kina, gjatë epidemive", shtuan dy ministrat amerikanë në deklaratën e lëshuar dje duke justifikuar refuzimin e ndryshimeve.
