Ish-presidenti i SHBA-së njëherësh dhe kandidati republikan për president, Donald Trump ka premtuar se, nëse zgjidhet, do të formojë një komision të pavarur presidencial, të cilit do t’i kërkojë publikimin e të gjitha dokumenteve të mbetura në lidhje me vrasjen e ish-presidentit amerikan, John F. Kennedy.
Trump e tha këtë në një tubim të fushatës në Arizona, ku u shfaq së bashku me Robert F. Kennedy Jr.
“Komisioni do të kryejë gjithashtu një analizë rigoroze të sulmeve të muajit të kaluar”, tha 78-vjeçari, duke iu referuar sulmit ndaj tij në një tubim në Pensilvani.
Deklarata e Trumpit erdhi menjëherë pasi kandidati i pavarur Robert Kennedy Jr. njoftoi se do të pezullonte fushatën dhe do të mbështeste kandidatin presidencial republikan.
Trump i tha CNN se ai “ndoshta” do t’i jepte Kennedy Jr një pozicion në administratën që do ta krijonte nëse ai tërhiqej nga gara presidenciale dhe merrte mbështetjen e tij.
Gjatë një fjalimi në Feniks të Arizonës, kandidati i pavarur për President, Robert F. Kennedy Jr. shtroi pakënaqësitë e tij me Partinë Demokrate, mediat dhe institucionet politike dhe lavdëroi ish Presidentin Trump. Ai foli për gati 20 minuta përpara se të thoshte në mënyrë të drejtpërdrejtë se po mbështeste kandidaturën e zotit Trump për president.
Një vit më parë, analistët politikë nuk do të mund të imagjinonin që një anëtar i familjes ndoshta më të njohur në politikën e Partisë Demokrate të punonte me zotin Trump kundër një kandidati demokrat në zgjedhjet presidenciale. Madje në muajt e fundit, Robert F. Kennedy e ka akuzuar zotin Trump se ka tradhtuar mbështetësit e tij, ndërsa zoti Trump e ka kritikuar zotin Kennedy, duke e quajtur atë "kandidatin e majtë më radikal në garë".
Pesë nga anëtarët e familjes Kennedy lëshuan një deklaratë të premten duke e quajtur mbështetjen e tij për zotin Trump "një fund të trishtuar për një histori të trishtuar" dhe duke përsëritur mbështetjen e tyre për demokraten Kamala Harris.
“Vendimi i vëllait tonë Bobby për të mbështetur zotin Trump sot është një tradhti ndaj vlerave më të rëndësishme të babait tonë dhe familjes sonë”, thuhet në deklaratën, të cilën motra e tij Kerry Kennedy e postoi në rrjetin X.
Robert F. Kennedy Jr., djali i Prokurorit të Përgjithshëm të ndjerë dhe Senatorit Robert Kennedy dhe nipi i Presidentit John F. Kennedy, pranoi se vendimi i tij për të mbështetur zotin Trump kishte shkaktuar tensione me familjen e tij të ngushtë. Ai është i martuar me aktoren Cheryl Hines, e cila shkroi në rrjetin X se ajo e respekton thellësisht vendimin e burrit të saj për t'u tërhequr nga gara presidenciale, por nuk përmendi mbështetjen e tij për zotin Trump.
