Pas vrasjes së aktivistit të djathtë Charlie Kirk në Utah, detajet e jetës private të dyshuarit për krimin, 22-vjeçarit Tyler Robinson, kanë dalë në dritë, duke shtuar edhe më shumë interesin dhe polemikat për ngjarjen që ka tronditur opinionin publik amerikan.
Sipas zyrtarëve të lartë të FBI-së, të cilët folën për Fox News Digital, Robinson kishte një "relacion sentimental" me një person në tranzicion gjinor nga mashkulli në femër. Dyshja jetonte së bashku në një apartament në Saint George, Utah, dhe partneri i Robinson është duke bashkëpunuar plotësisht me autoritetet në hetimet në vazhdim.
Sipas mediave amerikane, 22-vjeçari ndante një apartament me tre dhoma gjumi në Utah me një person transgjinor i cili ishte "në procesin e tranzicionit nga mashkull në femër". Personi thuhet se po "bashkëpunonte plotësisht" me FBI-në dhe i dorëzoi mesazhet në lidhje me armën e vrasjes, të cilat u dërguan nëpërmjet Discord. Konkretisht, në mesazh, Robinson tregonte vendin ku e kishte fshehur armën, në një zonë të pyllëzuar.
Ky informacion merr rëndësi të veçantë pasi Charlie Kirk ishte i njohur për qëndrimet e tij anti-transgender, një aspekt që shton dimensione të reja në hetimin mbi motivet e sulmit.
Në ndërkohë, pas vrasjes së Kirk, rrjetet sociale që lidhen me të kanë përjetuar një rritje masive ndjekësish dhe interesi i publikut është rritur ndjeshëm. Profili i tij kryesor në Instagram ka fituar më shumë se 3.5 milionë ndjekës të rinj, ndërsa faqja e tij në TikTok ka shtuar mbi 1.5 milionë ndjekës. Në Facebook, faqja e Kirk ka rritur ndjekësit me më shumë se 2.3 milionë persona, dhe kanali i tij në YouTube ka arritur 4.5 milionë abonentë, nga 3.8 milionë që kishte para sulmit.
Për më tepër, organizata e tij, Turning Point USA, ka parë një rritje të ndjekësve në YouTube, duke kaluar nga 3.3 milionë në 3.6 milionë abonentë.
Megjithëse llogaritë e Kirk mbahen kryesisht të paarritshme për postime të reja, statistikat nga SocialBlade tregojnë një shpërthim të madh të shikimeve dhe pëlqimeve për videot e publikuara më parë, që nga data e sulmit.
Fjalimi i gruas së Kirk, Erika, i transmetuar drejtpërdrejt në kanalin kryesor të YouTube, është parë mbi 3.1 milionë herë, duke përforcuar zërin dhe ndikimin që familja kërkon të mbajë gjallë pas tragjedisë.
Disa prej videove më të klikuara përfshijnë “Charlie Kirk i sjell humbje të mëdha Universitetit të Kalifornisë, San Diego”, me mbi 4 milionë shikime (nga 300 mijë më parë), dhe një debat tjetër me titull “Charlie Kirk rrëzon gënjeshtrat woke në Michigan State”, që ka kaluar një milion shikime, shumë më tepër se 250 mijë që kishte më parë.
Ngjarja ka ndezur një debat të fortë mbi ndikimin e mediave sociale dhe politikave identitare, ndërsa hetimet për motivet dhe përfshirjen e partnerit transgender në këtë ngjarje dramatike vazhdojnë./ VERSUS/
