Policia ka vënë në pranga ditën e sotme pas tre muajsh në arrati pronarin e subjektit ‘Buzi Store’ , Oltion Buzi.
Ndalimi i tij u bë pas vendimit të gjykatës që kishte caktuar në mungesë "arrest në burg" për veprën penale "fshehje të ardhurash".
Në janar të këtij viti, Prokuroria e kryeqytetit e shpalli në kërkim biznesmenin pasi akuzohet se kishte kryer evazion fiskal duke mos deklaruar 3.7 milionë euro të ardhura.
Hetimet për zbulimin e rastit të evazionit fiskal zgjatën me muaj. Sipas organit të akuzës, ‘Buzi Sport’ përdorte një sistem kompjuterik të paautorizuar për monitorimin dhe lëshimin e faturave tatimore.
Skema për kryerjen e evazionit fiskal
Sistemi operonte përmes platformës online të palicencuar “store.dyqanimen.com” dhe mundësonte lëshimin e faturave të falsifikuara, të cilat përmbanin mangësi të elementeve të kërkuara nga legjislacioni tatimor dhe ishin të pa fiskalizuara.
Në disa raste biznesi “Buzi Sport”, lëshonte fatura me vlera më të mëdha ndërkohë që deklaronte nëj vlerë shumë më të vogël, me qëllim që të shmange pagesën e tatimeve.
Në kuadër të hetimit ndaj këtij biznesi, janë kryer kontrolle në 8 adresa të lidhura “Buzi Sport” ku u sekuestruan provat materiale që përfshijnë njësi kompjuterike, telefona celularë, tableta dhe vlera monetare në valuta të ndryshme që arrijnë në 8,000,000 lekë, të cilat nuk ishin të justifikuara me dokumentacion ligjor./Versus.al
