Çfarë do të gjeni në brendësi
*Opozita nisi sot aksionin e bojkotit në komisionet parlamentare, përveç njërit, atë të Çështjeve Europiane ku ishin të pranishëm vetëm deputetët Edi Paloka dhe Jorida Tabaku të cilët thanë se nuk donin që socialistët të gjenin shkak për mungesën e opozitës në ngecjen e negociatave, pavarësisht se vendi sipas tyre nuk ka përmbushur asnjë kusht për t’u anëtarësuar. *Pas përfundimit të mbledhjes në komisionin e integrimit, Paloka mbajti një deklaratë për mediat ku tha se opozita do të kërkojë ngritjen e komisionit të së ‘Vërtetës’ për të zbardhur se cilët janë deputetët dhe ministrat socialistë të cilat shfaqen në përgjime me krimin e organizuar në aplikacionet si “Sky Ecc” apo “Encrochat”. *Ndërkohë, në orën 15:00 Paloka njoftoi mbledhjen e kryesisë së PD-së dhe më pas të grupit parlamentar për të përcaktuar sesi do të vijojë aksioni i tyre në Kuvend ku ditën e sotme pritet të mbahet një seancë plenare. *Përshkallëzimi i aksionit opozitar vjen pas arrestimit të deputetit Ervin Salianji i cili u dënua me 1 vit burg për kallëzim të rremë sa i takon dosjes ‘Babale’. Ndërsa në mbledhjen që u mbajt mbrëmë në Këshillin Kombëtar të PD-së, kryedemokrati Sali Berisha bëri thirrje për mosbindje civile dhe protestë masive më 7 tetor, me qëllim krijimin e një qeverie teknike pak muaj para zgjedhjeve parlamentare të 2025-ës.
“Deputetë e ministra në përgjime me krimin e organizuar”, Paloka: Të ngrihet komisioni i së ‘Vërtetës’
Kreu i Këshillit Kombëtar të PD-së, Edi Paloka ka dalë në një konferencë për mediat pas mbledhjes së komisionit për Çështjet Europiane ku ishte i pranishëm së bashku me deputeten Jorida Tabaku.
Para mediave, ai shpjegoi se përse u paraqitën në komision kur pak më herët njoftuan bojkotin e të gjithë komisioneve të tjera parlamentare. Ndërsa vijoi me akuzat ndaj qeverisë, duke thënë se vendi nuk është më në demokraci, Paloka foli për përfshirjen e depuetëve dhe ministrave socialistë në përgjime me krimin e organizuar në biseda të zbardhura në Encrochat.
“Do kërkojmë ngritjen e komisionit të vërtetës që do të zbardhë lidhjet e politikës me krimin. Në informacionet që kemi ne, dalin deputetë ministra të mazhorancës të lidhur me krimin. Kam dëgjuar këto ditë për histori të sajuara edhe për deputetë të opozitës, por në informacionet që kemi ne nuk ka ndonjë deputet të opozitës të përfshirë. Është përhapur një informacion i rremë në media për deputetë të opozitës, por ua them me garanci që është thjesht sajesë me qëllim shantazhimin e deputetëve për t’u mbyllur gojën”- deklaroi Paloka.
“Mbështesim në parim procesin e integrimit, nuk votuam në komision, u larguam të dy sepse në kushtet ku jemi kur Shqipëria nuk plotëson asnjë gjë, nuk mund të bëjmë të paditurin apo sikur nuk shohim vetëm sepse kështu i intereson Ramës apo atyre të tjerëve”- shtoi deputeti sa i takon pranisë së tij dhe Tabakut në komisionin e Çështjeve Europiane në kushtet kur opozita ka njoftuar bojkot total. Versus.al
Opozita në komisionin e integrimit: Drejtësia e kapur nga Rama, institucionet të korruptuara! Peleshi: Përdorni mikrofonin për politikë
Ndërkohë që njoftoi bojkotimin e komisioneve të tjera në shenjë revolte pas dënimit dhe arrestimit të deputetit Ervin Salianji, Partia Demokratike nuk e ka ndjekur këtë praktikë me komisionin e Çështjeve Europiane ku po shqyrtohet draft pozicioni negociues për grupimin e parë të kapitujve “Themelorët” për negociatat e anëtarësimit në BE.
Në nisjen e mbledhjes, ishte kryetarja e komisionit, Jorida Tabaku e cila lexoi një sërë shqetësimesh të cilat sipas opozitës janë tepër shqetësuese për demokracinë dhe situatën ku ndodhet vendi gjatë qeverisjes 11 vjeçare të Partisë Socialiste. Tabaku përmendi probleme të tilla si rritja e veprimtarisë së pastrimit të parave me anë të ndërtimit pa kriter, problemet e pazgjidhura në gjykata me qindra mijëra dosje të mbetura stok duke lënë qytetarët në vite të tëra pritje vetëm për të marrë një vendim.
“Një shtet i korruptuar është produkt i linjës së ngushtë mes kapjes së institucioneve nga krimi i organizuar. Përballemi me flukse financiare të paligjshme të cilat duhet të reflektohen në kapitujt e parë që diskutohen në këtë pozicion negociues. Një boom ndërtimi ka sjellë ndikim të pashoq në pastrimin e paravave. Sipas progress raportit, qytetarët presin me vite për vendime gjyqësore. Duhen marrë masa për të zvogëluar stokun me 139 mijë dosje”- tha mes të tjerash Tabaku.
Nga ana tjetër, kreu i grupit parlamentar të PS, Niko Peleshi i cili ishte i pranishëm në mbledhje e konsideroi të gabuar mënyrën sesi Tabaku e hapi mbledhjen pa u siguruar mbi kuorumin e nevojshëm të pjesëmarrjes kur diskutohet për një gjë kaq të rëndësishme sa i takon integrimit europian të vendit.
“Ta fillosh një mbledhje pa e deklaruar të hapur, pa e ditur nëse ka apo jo kuorum, pa njoftuar se çfarë do diskutohet. Të shfrytëzosh këtë mikrofon për deklarata publike është shumë politike por jo qytetare. Politika ikën e vjen, ne nuk ju ndërpremë fjalën ju respektuam që në këtë proces të mblidhemi për diçka që nuk është vetëm në interesin tonë apo tuajin por në interes të shqiptarëve”- u shpreh Peleshi.
Deklarata e këtij të fundit, pati një përgjigjie nga deputeti demokrat Edi Paloka i cili akuzoi qeverinë se ka bllokuar reformën elektorale prej 11 vitesh. Ndërsa akuza pati edhe për kryeministrin Edi Rama i cili sipas tij, ka kapur institucionet e drejtësisë.
"Në vazhdim të asaj që tha Tabaku nuk besoj se ka shqiptar që nuk e di pozicionin e PD kur vjen puna për integrimin e Shqipërisë në BE. Ne e shohim si mundësi dhe të ardhme më të mirë për shqiptarët. Por në kushtet e sotme, kur një narko regjim si ky i Ramës ka vendosur diktatin e tij, jemi të detyruar të pranojmë se Shqipëria e Edi Ramës nuk plotëson as edhe një nga kushtet që kërkon BE. Disa nga pikat që ne duam të adresojmë në këtë rast, së pari është reforma elektorale e bllokuar prej 11 vitesh nga regjimi. Për një proces civil i duhet çdo qytetari 14 vite ndërsa për ato penalë 10 vite. Kjo drejtësi sot është tërësisht e kapur dhe në duart e Edi Ramës. Në prag të zgjedhjeve, të gjithë krerët e partive kryesore opozitare janë ose në arrest ose në përndjekje dhe çështje penale nga kjo drejtësi gjoja e reformuar. Ky parlament nuk zbaton më as vendimet e GJK. Kur Kushtetuesja merr vendim dhe mazhoranca nuk e respekton për çështjen Xhaçka, tregon fare qartë se ku jemi aktualisht”- tha Paloka.
Pasditen e sotme, Kuvendi pritet të mbajë një seancë plenare ku kryeparlamentarja Elisa Spiropali ka njoftuar se do të lexojë shkresën e gjykatës së Tiranës ku jepet vendimi për dënimin me 1 vit burg të deputetit Ervin Salianji. Opozita pritet të bojkotojë Kuvendin ose të paraqitet për të pamundësuar vijimin normal të seancës. Në mbledhjen e mbrëmshme të Këshillit Kombëtar, u vendos për mosbindje civile deri në formimin e qeverisë teknike. Versus.al
PD nis aksionin pas arrestimit të Salianjit, bojkot i të gjithave komisioneve parlamentare përveç njërit
Nga dita e sotme, Partia Demokratike i është rikthyer bojkotit të komisioneve parlamentare në vend, lëvizje e paralajmëruar që pas arrestimit të deputetit Ervin Salianji i cili u dënua me 1 vit burg për kallëzim të rremë lidhur me dosjen “Babale”.
I vetmi komision parlamentar ku opozita do jetë e pranishme, do jetë vetëm ai për Çështjet Europiane, nga ku deputetja Jorida Tabaku si kryetare komisioni dhe kolegu i saj Edi Paloka do mbajnë deklaratë lidhur me arrestimin të cilin ata e konsiderojnë si politik dhe për këtë kanë nisur edhe një sërë aksionesh të tjera që pritet të kulmojnë më 7 tetor, ditën kur është thirrur protestë kombëtare.
Në mbledhjen e mbrëmshme të Këshillit Kombëtar të PD, u bë thirrje nga kryedemokrati Sali Berisha për organizim dhe marrje masash deri në mosbindje civile gjë që sipas tij do të çojë në formimin e qeverisë teknike pak muaj para zgjedhjeve parlamentare të 2025-ës. Versus.al
