Selia e PD

Partia Demokratike, ka kërkuar 6 orë debat në seancën e jashtëzakonshme që është caktuar të mbahet sot në orën 17:00 për ndryshimet në kryesinë e Kuvendit dhe të kabinetit qeveritar.

Gjatë seancës do të votohet me votim të fshehtë për kryeparlamentaren e propozuar nga PS, Elisa Spiropali e cila do të zëvendësojë Lindita Nikollën pasi kjo e fundit dha dorëheqjen për shkaqe shëndetësore.

Në një deklaratë për mediat PD ka kërkuar që seanca të zhvillohet me debat për qeverinë e re, me argmentin se “përbërja e këshillit të ministrave nuk duhet të jetë vetëm në dorën e Ramës dhe Kuvendi të ketë vetëm rol formal”. Deklarata e PD vjen pasi presidenti Begaj dekretoi shkarkimet dhe emërimet e reja të proozuara nga Rama në kabinetin qeveritar. Versus.al

Presidenti Bajram Begaj ka dekretuar sot shkarkimet dhe emërimet e reja në qeverinë “Rama 3”. Dekretimi vjen dy ditë pasi kryeministri Edi Rama dorëzoi në presidencë propozimet për ministrat e rinj të kabinetit dhe lëvizje brenda qeverisë.

Paraditen e sotme, Begaj dekretoi:

shkarkimin e Niko Peleshit si ministër i Mbrojtjes dhe emërimin e Piro Vengut si drejtues i këtij dikasteri.

shkarkimin e Taulant Ballës si ministër i Brendshëm dhe emërimin e Ervin Hoxhës në vend të tij.

shkarkimin e Elisa Spiropalit si ministre e Shtetit për Marrëdhëniet me Parlamentin dhe emërimin e Taulant Ballës në vend të saj

shkarkimin e Ervin Metes si ministër i Financave dhe emërimin e Petrit Malajt në vend të tij.

Me dekretimet e Begajt, i hapet rruga Kuvendit për seancën e jashtëzakonshme ditën e sotme që pritet të mbahet rreth orës 17:00 ku pritet të votohet me votë të fshehtë Elisa Spiropali si kryeparlamentare dhe me votë të hapur ministrat e rinj. Nga ana tjetër Partia Demokratike pretendon se nuk është njoftuar për seancë të jashtëzakonshme dhe se sipas rregullit, një gjë e tillë duhej të ishte bërë para 48 orësh. 

Ndryshimet në qeveri të cilat Rama i lajmëroi gjatë kongresit të PS të dielën, surprizuan jo pak pasi kreu i qeverisë zgjodhi emra jo politikë në krye të disa prej dikastereve më të rëndësishme të shtetit. Opozita e cilësoi këtë si një lëvizje të Ramës për të pasur pushtet të plotë mbi çdo dikaster. Versus.al

Pasditen e sotme në orën 17:00 Kuvendi mblidhet në një seancë të posaçme për të votuar emërimin e Elisa Spiropalit si kryetare e Kuvendit si dhe ministrat e rinj të emëruar nga kryeministri Edi Rama gjatë kongresit të PS të mbajtur dy ditë më parë.

Ndërkohë sot pritet edhe dekretimi i ministrave të rinj nga ana e presidentit Bajram Begaj i cili si për çudi ndodhej në selinë e tij edhe të dielën, kur kryeministri Edi Rama shkoi në presidencë për t’i dorëzuar propozimet e emrave të rinj si presidentë.

Ndërkohë, paraditen e djeshme kryeministri Edi Rama mblodhi grupin parlamentar ku u prezantua si kryetar Niko Peleshi, ndërsa Bledi Çuçi do të mbajë postin e nënkryetarit të Kuvendit. Duke ndjekur të njëjtën rrjedhë fjalimi si gjatë kongresit, Rama u dha afat deputetëve deri në prill që t’i provojnë se e meritojnë të jenë në listat për kandidatë në zgjedhjet parlamentare 2025.

Të dielën, Rama surprizoi me ndryshimet në qeveri, duke zgjedhur emra jo politikë në krye ministrive. Taulant Balla u largua nga posti i ministrit të Brendshëm duke zëvendësuar Elisa Spiropalin si ministër i Marrdhëneve me Parlamentin. Vendin e Ballës e zë kreu aktual i IKMT, Ervin Hoxha. Ndërsa vendin e Niko Peleshit e zë drejtori aktual i portit të Durrësit, Pirro Vengu. Surprizues ishte edhe shkarkimi nga detyra i Ervin Metes, dhe emërimi në krye të ministrisë së Financave i Petrit Malajt, drejtorit të AKBN. Këto ndryshime u panë nga opozita si përpjekje e Ramës për të përqendruar akoma më shumë pushtetin në duart e tij duke shmangur emrat politikë në krye të dikastereve. Versus.al