Ervin Salianji është në qeli, por Facebook-u i tij duket se është më i lirë se kurrë. Demokrati Ervin Salianji ka reaguar përmes një postimi në “Facebook”, 24 orë pas dërgimit të tij në burgun e Fierit.

Ai falenderon mbështetësit e tij, ndërsa shkruan se do të përdorë gjithë energjitë për të dal triumfues ndaj të keqes, që sipas tij, ka mbërthyer vendin.

“Miqtë e mi, mbështetja dhe forca që më keni dhënë në këto 24 orë ka qenë e jashtëzakonshme! Dua t’ju siguroj se kam gjithë energjitë për të dal triumfues dhe për t’u bashkuar me ju në luftë ndaj të keqes që mban mbërthyer këtë vend prej 11 vitesh! Falenderime nga zemra”, - shkruhet në FB e deputetit demokrat.

Ervin Salianji u dërgua në burgun e Fierit, ku do të vuajë dënimin me një vit heqje lirie nën akuzë për “kallëzim të rremë” lidhur me dosjen 'Babale" 

Një ditë pas burgosjes së deputetit Ervin Salianji, Partia Demokratike ka nisur dosjen e plotë shpjeguese të këtij rasti në kancelaritë dhe mediat kryesore të botës. PD-ja këmbëngul në dosjen e shpërndarë se dënimi i ligjvënësit demokrat dy ditë më parë nga Gjykata e Apelit ka motive politike.

Në 15 pika shpjegohet shkurtimisht saga e denoncimeve, të cilat nisën në vitin 2018, kur Ervin Salianji publikoi vendimin e formës së prerë të Gjykatës Italiane, i cila kishte dënuar me 7 vite e 4 muaj burg për trafik ndërkombëtar droge vëllain e Ministrit të Brendshëm, Agron (Geron) Xhafaj.

Në dosje është pasqyruar fakti se pas këtyre denoncimeve, Agron (Geron) Xhafaj shkoi në burg në Romë, Itali, ndërsa vëllai i tij, Ministër i Brendshëm, Fatmir Xhafaj, dha dorëheqjen nga detyra.

Në dosje ndër të tjera sqarohet se “vendimi politik për burgosjen e opozitarit Ervin Salianji u bë nga trupa gjykuese, e përbërë nga gjyqtarët Genti Shala dhe Iliba Bezati.

“Genti Shala është ish-përfaqësues politik i Partisë Socialiste në Komisionin Qëndror të Zgjedhjeve dhe kandidat për anëtar i Gjykatës së Lartë, ku dihen lidhjet e forta të Fatmir Xhafajt”, thuhet në dosje.

Dosja e PD dërguar kancelarive

Kryetari i Partisë Demokratike, Sali Berisha ka konfirmuar se Ervin Salianji do të vijojë të jetë drejtues politik i qarkut të Elbasanit, detyrë që siç duket do e bëjë nga burgu.

Ai shprehu bindjen se guximi i Salianjit për të mbrojtur interesin publik, do të ketë mirënjohjen e qytetarëve të Elbasanit.

‘I deleguari i nderit në qarkun e Elbasanit do të jetë Ervin Salianji. Unë kam bindjen se ky akt, se guximi i Ervin Salianjit për të mbrojtur të vërtetat dhe interesin publik të qytetarëve shqiptarë, ka mirënjohjen më të thellë të qytetarëve të Elbasanit’, tha kryedemokrati Sali Berisha në një konferencë me gazetarët.

Avokatët deputetit demokrat Ervin Salianji kanë depozituar një ditë më parë, në Gjykatën e Tiranës, një kërkesë për shtyrjen e ekzekutimit të dënimit me burg.

Kujtojmë se Gjykata e Apelit shpalli disa ditë më parë vendimin e formës së prerë për Ervin Salianjin, i cili akuzohet për kallëzim të rremë në dosjen "Babale", duke lënë në fuqi vendimin e Shkallës së Parë që e kishte dënuar me 1 vit burg.

Përveçse do të përfundojë pas hekurave, Salianji do të humbasë edhe mandatin si deputet i Partisë Demokratike në qarkun e Korçës.

Neni 71.1 i Kushtetutës përcakton se deputeti e humb mandatin e tij kur dënohet me vendim gjyqësor të formës së prerë për kryerjen e një krimi.

Konstatimi i humbjes së mandatit të tij do të formalizohet përmes Këshillit të Mandateve në Kuvend që njofton Komisionin Qendror të Zgjedhjeve për vakancën e krijuar. Në momentin që KQZ njoftohet se është krijuar një vakancë në Kuvend, përcakton se cilit qark dhe cilës forcë politike i përket mandati i mbetur bosh.

Gjasat janë që mandati i Salianjit t’i takojë ish-prefektit të qarkut të Korçës, Andrea Mano.

Një ditë para se të merrej vendimi, deputeti demokrat lëshoi akuza ndaj gjyqtarit të shkallës së parë, që e dënoi me një vit burg.

Ndërsa për gazetarin Jetmir Olldashi vendimi i Gjykatës së Apelit është 100 orë punë në komunitet.

Fredi Alizoti, dëshmitari kyç i cili përmes rrëfimit të tij të dhënë në Prokurorinë e Krimeve të Rënda, ktheu përmbys dosjen “Babale”, duke treguar se përgjimi për Geron Xhafajn, ishte një sajesë mes (Babales) Albert Veliut dhe vetë Alizotit, rezulton të jetë rrahur barbarisht nga Behar Bajri dhe anëtarët e grupit të tij.

Dëshmia e Fredi Alizotit shërbeu jo vetëm për të pastruar figurën e Geron alias Agron Xhafaj në dosjen “Babale”, por u bë prova kryesore për dënimin nga gjykata me 1 vit burgim të deputetit të PD, Ervin Salianji, dënimin e Albert Veliut alias “Babale” dhe gazetarit Jetmir Olldashi.

Sipas bisedave të zhvilluara në aplikacionin “Sky” krijohet dyshimi se rrahja e Alizotit, është kryer në lagjen “Dobraç” të Shkodrës, ku Fredi në 3 korrik 2020, kishte shkuar në qytetin verior, duke depërtuar më pas në lagjen e Behar Bajrit në “Dobraç”.

Gazetari i Elton Qyno ka mësuar se në këtë kohë Behar Bajri, me firmën e gjyqtarit Sokol Shehu, kishte vetëm 4 ditë që kishte lënë qelinë e paraburgimit Nr. 313 në Tiranë, duke u vendosur në masën e “detyrimit për paraqitje”.

Teksa Behari, qëndronte në banesën e tij, në lagje kishte rritur masat e sigurisë, duke ju frikësuar një sulmi të mundshëm nga kundërshtarët e tij.

Mirëpo në rrethana të paqarta Fredi Alizoti nga Fieri protagonist kryesor i dosjes “Babale”, hyn në “Dobraç” dhe fillon të kërkojë Behar Bajrin, për ta takuar. Alizoti kapet nga anëtarët e grupit dhe rrihet barbarisht deri në atë masë, sa i shpëton urina në pantallona.

Dhuna fizike e kryer në grup ishte një specialitet i grupit të Behar Bajrit në Shkodër. Një fakt i tillë del gjatë dy bisedave që Behar Bajri zhvillon me biznesmenin Pëllumb Gjoka, ku mes komunikimeve të zhvilluara në aplikacionin “Sky” të datës 3 korrik 2020, Behari i thotë Pëllumbit:

“…a e njeh këtë se nuk e njoh unë, se më thotë veç kam ardhur me të taku për nji Alizoti… Fred Alizoti, qa ky…? Pyet njëherë…”.

Dhe Pëllumbi ia kthen si më poshtë vijon: “…prit të pyes…”.

Por Behari vijon t’i shkruajë Pëllumbit duke i thënë se nëse ka ndonjë kush ndonjë gjë me këtë ta humbi kundi krejt, nëse e ka aty në “Dobraç”.

“…pyet i her, a ka kush najgja ta hupi krejt. Nëse asht najgja, se e kam këtu kurvën…”-i thotë Behari, Pëllumbit.

Por ky i fundit ia kthen: “…është Fierak, është mashtrues, ai që spiunoi…prit pak, është ai që spiunoi vëllain e Xhafës”.

Behari: “…aaaa po…nëse ka najgja e hupi krejt, nej shok a kujt që i intereson, por pyet njëherë…”.

Pëllumbi: “…Prit se po pyes at shokun tem at qerosin, po pate mundësi mja ban një foto…?”.

Ndërsa Behar Bajri ia kthen Pëllumbit duke i shkruar: “…Po Fred Alizoti, a ka ken në burg…?”

Por në këtë moment Pëllumb Gjoka i dërgon në “Sky” një foto të Fredi Alizotit, kur ka dalë para gjykatës së Tiranës për masën e sigurimit “arrest në burg” në dosjen “Babalja”, duke i shkruar Beharit si më poshtë:

“…asht mashtrues, po përcille…s’ka ça të duhet e mos fol asgja me atë. Është njeri kot komplet, nuk ja vlen për asgja…”.

Behari i thotë: “…i bani komplet pantadhonat shurr ky kurv, e nisi të shurrum…”.

Pëllumbi ia kthen: “…asht legen edhe mund ta fusin kundërshtarët për 500 mijë lek dhe policia…”.

Ndërkohë në një bisedë të dytë të zhvilluar sërish mes këtyre dy personazheve, Pëllumb Gjoka i ankohet Beharit duke i thënë se ku ishte futur që nuk e hapte telefonin, pasi i kishte rënë disa herë.

Por Behari ia kthen se nuk e kishte dëgjuar telefonin pasi ishte duke rrahur njërin, që kishte hyrë në “Dobraç” me kapele policie.

Behari e sqaron Pëllumb Gjokën se e ka rrahur dhe më pas ja kishte dhënë në dorëzim furgonit për ta marrë.

Deputeti i Partisë Demokratike, Ervin Salianji, ka reaguar nga burgu përmes një postimi në rrjetet sociale, ku shprehet se dënimin e tij e cilëson medalje në karrierën e tij politike.

“Nuk ka diktaturë që nuk mposhtet!

Kjo është vetëm medalje në karrierën time politike✌️”, shkruan demokrati krahas videos, ku shihen momente nga vetëdorëzimi i tij dhe më pas transferimi i tij në burgun e Fierit, ndërsa është vendosur mbishkrimi “Burg politik”.

Kujtojmë se Salianji u vetëdorëzua pasditen e të premtes pranë ambienteve të drejtorisë së Policisë së Tiranës, dhe më pas u transferua drejt burgut të Fierit, ku pritet të kalojë ditët e dënimit.