Këshilli i Lartë Gjyqësor ka zhvilluar sot një mbledhje lidhur me ngjarjen tragjike të ndodhur ditën e djeshme në Apelin e Tiranës ku gjyqtari Astrit Kalaja u vra brenda sallës së gjyqit.

Duke shyqrtuar rrethanat e ngjarjes, KLGJ ka bërë publike shkresat dhe korrespondencën e zhvilluar me institucionet shtetërore për garantimin e sigurisë në ambientet gjyqësore. Nëpër të gjitha gjykatat e vendit, ka vetëm një polic të pranishëm në hyrjen kryesore.

“Iliryan Guard” rezulton të jetë kompania përgjegjëse për ruajtjen e godinave të gjykatave dhe kjo kompani shtetërore është në varësi të ministrisë së Brendshme. Duke e konsideruar situatën  të jashtëzakonshme KLGJ kërkon që të merren masa urgjente me prani efektive të policisë për garantimin e sigurisë së gjyqtarëve.

Sipas KLGJ, pavarësisht kërkesës për shtimin e efektivëve në gjykata, policia e kishte konsideruar "të pamundur" diçka të tillë. 

Njoftimi i plotë:

Këshilli i Lartë Gjyqësor shpreh edhe njëherë dhimbjen më të thellë dhe indinjatën më të madhe për ngjarjen tragjike të ndodhur, ku në ushtrim të detyrës, gjyqtari Astrit Kalaja humbi jetën brenda sallës së gjyqit.

Ky akt i rëndë përbën një sulm ndaj vetë themeleve të drejtësisë, ndaj autoritetit të gjykatës dhe ndaj rendit kushtetues të Republikës së Shqipërisë.

Këshilli i Lartë Gjyqësor, në emër të gjithë trupës gjyqësore të vendit, shpreh ngushëllimet më të ndjera familjes, kolegëve dhe komunitetit të gjyqtarëve, duke theksuar se drejtësia nuk mund të gjunjëzohet nga dhuna.

Në këtë situatë të rëndë, Këshilli i Lartë Gjyqësor u mblodh sot në Mbledhje të Jashtëzakonshme, për të shqyrtuar rrethanat e ngjarjes dhe për të analizuar masat aktuale të sigurisë në gjykata.

Në përfundim të mbledhjes, Këshilli vendosi të bëjë publike të gjitha shkresat dhe korrespondencën zyrtare që ka zhvilluar me institucionet përgjegjëse për garantimin e sigurisë në ambientet gjyqësore, me qëllim transparencën dhe informimin e publikut.

Këshilli i Lartë Gjyqësor informon se, në të gjitha gjykatat e Republikës së Shqipërisë, Policia e Shtetit aktualisht ofron shërbimin e saj vetëm me një punonjës në hyrjen kryesore ku lëvizin palët dhe publiku.

Në zbatim të pikës 2 të VKM Nr. 333, datë 28.04.2010, “Për ruajtjen dhe sigurinë e objekteve shtetërore”, gjykatat duhet të ruhen nga punonjës të Policisë së Shtetit, për të garantuar rendin dhe qetësinë gjatë seancave gjyqësore. Jashtë orarit zyrtar, ruajtja kryhet nga “Illyrian Guard”, e cila është një kompani shtëtërore në varësi të Ministrisë së Mbrendshme.

Duke vlerësuar se gjykatat janë objekte të një rëndësie të veçantë, Këshilli ka paralajmëruar në mënyrë të përsëritur se mungesa e prezencës efektive të policisë në sallat e gjyqit krijon risk serioz për sigurinë e gjyqtarëve, stafit dhe publikut.

Me shkresën nr. 5489/1 Prot., datë 02.11.2023, drejtuar Policisë së Shtetit dhe për dijeni Ministrisë së Brendshme, Këshilli ka kërkuar shtimin e punonjësve të Policisë së Shtetit në ambientet e brendshme të gjykatave dhe sallave të gjykimit gjatë zhvillimit të seancave.

Në përgjigje, me shkresën nr. 9683/3 Prot., datë 11.12.2023, Policia e Shtetit ka njoftuar se “aktualisht e kemi të pamundur shtimin dhe planifikimin e punonjësve të policisë për sigurimin e ambienteve të brendshme të gjykatave dhe gjatë zhvillimit të seancave gjyqësore, për shkak të limitit të kufizuar të personelit policor”.

Pas kësaj përgjigjeje, Këshilli i Lartë Gjyqësor, me shkresën nr. 5489/3 Prot., datë 15.12.2023, i është drejtuar zyrtarisht Ministrisë së Brendshme, duke kërkuar ndërhyrje urgjente:

“Duke marrë shkas nga ngjarjet e fundit të kërcënimeve ndaj gjyqtarëve, si pasojë e ushtrimit të detyrës, kërkojmë marrjen e masave për shtimin e organikës dhe planifikimin e punonjësve të Policisë së Shtetit për sigurimin e ambienteve të brendshme të gjykatave dhe prezencën e tyre gjatë zhvillimit të seancave gjyqësore publike.”

Në këtë moment të rëndë për sistemin e drejtësisë, Këshilli i Lartë Gjyqësor apelon për përgjegjësi të menjëhershme institucionale nga organet ligjzbatuese dhe ekzekutive, për të garantuar sigurinë fizike të gjyqtarëve dhe të gjithë pjesëmarrësve në proceset gjyqësore.

Ngjarje të tilla nuk mund të trajtohen si raste të izoluara, ato kërkojnë reagim të fortë, sistematik dhe të koordinuar, në mënyrë që të mos përsëritet më kurrë një humbje jete në sallën e gjyqit, vendi ku drejtësia duhet të mbrohet, jo të rrëzohet. Versus.al

Rakip dhe Ervis Kurtaj, babë e bir të cilët mbetën të plagosur gjatë atentatit në sallën e gjyqit ku u vra gjyqtari Astrit Kalaja kanë lënë sot spitalin e Traumës pasi morën ndihmën e nevojshme mjekësore dhe gjendja e tyre raportohet të jetë e qëndrueshme.

Të dy kanë dhënë dëshmitë para oficerëve të policisë duke rrëfyer momentet e tmerrit brenda sallës gjyqësore të Apelit. Ata kanë treguar se gjithçka kishte ndodhur brenda pak sekondash duke shkaktuar kaos tek të gjithë të pranishmit.

Sipas tyre, çdo gjë u tensionua menjëherë pasi gjyqtari shpalli vendimin që nuk ishte në favorin e familjes Shkambi. Pasi Kalaja lexoi vendimin, Shkambi nxorri armën që e mbante të fshehur poshtë xhaketës dhe qëlloi disa herë në drejtim të tij.

Dëshmia e Rakip dhe Ervis Kurtaj: Ngjarja ndodhi shumë shpejt. Kalaja u përpoq të mbrohej, por nuk kishte as hapësirë, as kohë. Elvisi iu afrua dhe e qëlloi nga shumë pranë duke i thënë: “Vetë e kërkove”. Pastaj u kthye nga ne dhe sekretarja, por arma nuk kishte më plumba”, kanë treguar Rakip dhe Ervis Kurtaj.

Më tej në dëshmi, ata thanë se autori i krimit doli me qetësi nga salla, ndërsa të tjerët u përpoqën t’i jepnin gjyqtarit ndihmën e parë.

“U munduam ta ndihmonim, por ai nuk reagonte. Pas pak minutash erdhi policia dhe ambulance. Kur dolëm jashtë, pamë që arma ishte lënë te dera, ishte shumë e vogël. Na erdhi shumë rëndë për gjyqtarin, por sinqerisht, kjo ishte një situatë që e kishim frikë prej kohësh”, kanë thënë ata.

“Na thonin se do na hidhnin në rrugë, sa herë na shihnin. Ishte bërë si makth kjo histori”, janë shprehur babë e bir duke theksuar kërcënimet e vazhdueshme që kishin marrë nga familja Shkambi. Versus.al

Në rrjetet sociale është publikuar një letër e cila thuhet se është shkruar për Elvis Shkambin, vrasësin e gjyqtarit Astrit Kalaja ditën e djeshme në Apelin e Tiranës. Në letrën e cila pretendohet se është shkruar nga një shok i gjimnazit me 30 vjeçarin e arrestuar, ky i fundit cilësohet si “viktimë’ e proceseve gjyqësore dhe e institucioneve përgjegjëse që thuhet se e futën në konflikt të vazhdueshëm.

“Ti Elvis linde pronar, por jetoje me qera sepse pronën tane e gëzonte dikush tjetër”- thuhet mes të tjerash në letrën e shkruar.

Duke e cilësuar si person me fëmijëri të vuajtur, personi që ka shkruar letrën e përshkruan autorin e ngjarjes si një prej nxënësve më të mirë dhe thotë se padrejtësia e kishte shtyrë të kryente aktin makabër.

Letra e plotë:

Shkruar nga një shok i gjimnazit “At Pjetër Meshkalla"

Elvis! Ti nuk je vrasës!

Vrasëse ishte padrejtësia, vrasës ishin ata fashikujt e humbur nëpër gjykata të pronës tënde, aty ku duhet të ishin të sigurtë.

Vrasës ishin seancat gjyqësore pa mbarim nëpër gjykata, vrasës ishin institucionet përgjegjëse që ju futën në konflikt të pa kthyeshëm.

Vrasëse ishte ajo fëmijëria jote e palumtur tek shikoje familjen tane dyerve te gjykatave duke kërkuar drejtësi.

Ti Elvis linde “Pronar” por jetoje me qera sepse pronën tane e gëzonte dikush tjeter, madje disa prej tyre kishin ndertue shtëpin e tyre dhe pronen tane e jepnin me qera.

Ti skishe mundësi te paguaje as qeranë Elvis!

Ty Elvis të rriti gjyshi nga nëna së bashku me motren tane, të rriti me shume mune e sakrifica, por ty Elvis te çoi me studiu në shkollat më të mira të qytetit te Shkodrës.

Elvis, ti ishe ai student i gjimnazit më të mirë në Shkodër “At Pjetër Meshkalla” që rrije i ndrojtur ne bankën tënde sepse nuk visheshe me rroba firmato por, ato që vishje i kishe të PASTRA . Ti ishe një ndër nxënësit më të mirë të Gjimnazit “At Pjetër Meshkalla”

Ti u diplomove për drejtësi Elvis, por ajo ta mori peng rininë!

Edhe nje herë:

Ti nuk je vrasës Elvis!

Zoti qoftë me ty!

E paç jetën e gjatë o djalë!

Të duam dhe të mbështesim fort !

Shkruar nga nje shok I gjimnazit “At Pjeter Meshkalla

Shkodër, me 07/10/2025. Versus.al

Të gjitha gjyqet në gjykatën e Apelit përgjatë javës do të pezullohen pas ngjarjes së rëndë të ndodhur dje ku u ekzekutua brenda sallës së gjyqit, gjyqtari Astrit Kalaja.

Ditën e nesërme në ambientet e Pallatit të Kongreseve do të mbahen homazhe në nderim të Kalasë. Ceremonia do të nisë në orën 09:00 dhe pritet të zgjasë deri në orën 11:00.

I ndjeri do të përcillet në banesën e fundit më datë 8 tetor në vendin e lindjes në Shkodër. Versus.al

Policia ka zbardhur dinamikën e vrasjes së ndodhur ditën e djeshme në sallën e gjyqit të gjykatës së Apelit ku u ekzekutua me armë zjarri gjyqtari Astrit Kalaja. Në pranga për këtë ngjarje kanë rënë, autori Elvis Shkambi 30 vjeç, xhaxhai i tij Gjon Shkambi, 56 vjeç dhe roja i sigurisë së gjykatës, Banush Koxha, 63 vjeç.

Dinamika e ngjarjes

Për të zbardhur krimin e rëndë, policia ka analizuar të gjitha pamjet e siguruara nga kamerat e sigurisë. Në orën 13:42 në ambientet e sallës së pritjes për publikun në gjykatë, janë future dhe kanë kaluar tek pajisja e skanerit autori Elvis Shkambi dhe xhaxhai i tij Gjon Shkambi.

Detektori i metaleve ka sinjalizuar me dritë të kuqe, pasi Elvis Shkambi mbante pistoletën tip “Berreta” në brez, por pavarësisht këtij sinjalizimi roja, Banush Koxha ka qëndruar i ulur në karrige dhe nuk ka kryer asnjë veprim për të kontrolluar personat që po hynin në gjykatë duke mos bërë as regjistrimin e tyre në librin e protokollit.

Të dy, Elvis Shkambi dhe xhaxhai i tij qëndrojnë në hollin e pritjes së gjykatës deri rreth orës 15:29 dhe futen në ambientet e sallës ku zhvillohej senaca gjyqësore. Në orën 15:35 palët ngrihen në këmbë dhe menjëhere pasi gjyqtari Astrit Kalaja shpalli vendimin, Elvis Shkambi nxorri armën dhe qëlloi disa herë në drejtim të tij duke i shkaktuar vdekjen.

Njëkohësisht pas këtij veprimi, Shkambi i drejton pistoletën dhe qëllon njëherë në drejtim të palës paditëse Rakip Kurtajt dhe djalit të tij Ervis Kurtaj duke i lënë të dy të plagosur. Sipas hetimeve, rezulton se Gjon Shkambi nuk ndërmerr asnjë veprim për të ndaluar veprimet kriminale të nipit të tij, duke ngjallur dyshimet se ai ka qenë në dijeni për ekzekutimit të gjyqtarit ose ndihmës.

Pasi ka kryer aktin e rëndë, Elvis Shkambi ka dalë nga salla dhe ia ka dorëzuar pistoletën “Berreta” nënpunësit gjyqësor, B.P.

Në përfundim të të gjitha veprimeve proceduriale, u bë arrestimi në flagrancë sipas veprave penale si më poshtë:

Elvis Shkambi, 30 vjeç, si i dyshuar për veprat penale të “Vrasja e funksionarëve publikë” e kryer në bashkëpunim, “Vrasja në rrethana të tjera cilësuese kundër dy ose më shumë personave” e mbetur në tentativë dhe e kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”;

Gjon Shkambi, 56 vjeç, si i dyshuar për veprat penale të “Vrasja e funksionarëve publikë” e kryer në bashkëpunim dhe “Vrasja në rrethana të tjera cilësuese kundër dy ose më shumë personave” e mbetur në tentativë dhe e kryer në bashkëpunim;

Banush Koxha, 63 vjeç, si i dyshuar për veprën penale të “Shpërdorimit të detyrës”;

Policia ka sekuestruar në cilësinë e provës materiale pistoletën me tre fishëkë të përdorur nga autori dhe prova të tjera materiale të gjetura në vendin e ngjarjes. Versus.al

Policia ka arrestuar edhe Gjon Shkambin, xhaxhain e Elvis Shkambit, 30 vjeçarit që vrau me armë zjarri gjyqtarin Astrit Kalaja brenda sallës së gjyqit. Gjon Shkambi ka qenë brenda sallës së gjyqit kur nipi i tij nxorri pistoletën “Berreta” dhe hapi zjarr drejt gjyqtarit dhe palës kundërshtare për pronën.

Por, një gjurmim i vogël i zhvillimit të kësaj ngjarje, zbulon se tragjedia ishte paralajmëruar një vit më parë në media pasi Gjon Shkambi kishte kërcënuar me fjalët “do t’ju hedh në erë” anqtarët e palës kundërshtare të gjyqit. Kërcënimi është bërë në emisionin “Shihemi në gjyq” duke paralajmëruar se do të hidhte në erët godinën e ish-Shkollës së Rezervave në lagjen “Skanderbeg” të Shkodrës.

Për ironi të fatit emisioni është transmetuar në 6 tetor të vitit të kaluar, si dje një vit më parë.

“Ja gjej unë formën se si me e liru. Si ta minoj në 4 qoshet se është prona ime. E kam me certifikatë. Të gjithë do t’ju hedh në erë. Po ju paralajmëroj, të gjithë do t’ju hedh në erë”, shprehej Shkambi gjatë përballjes me personin që po fliste lidhur me këtë çështje.

Në pranga për ngjarjen ka rënë edhe roja i godinës së gjykatës së Apelit për shkak se nuk kreu detyrën për të mos lejuar autorin të hynte në gjykatë me pistoletë në brez. Detajet zbuluan se detektori i metaleve nuk punonte prej ditësh. Versus.al

Gjyqtari i ndjerë, Astrit Kalaja

Vrasja e gjyqtarit Astrit Kalaja brenda sallës së gjyqit në një akt të paprecedentë në vendin tonë, ka tronditur gjithë opinionin publik që edhe këtë herë është i ndarë në disa kahe.

Një gjyqtar i ka rrëfyer gazetares Anila Hoxha bisedën e fundit që kishte patur me kolegun e tij të ndjerë para se të vritej brenda sallës së gjyqit menjëherë pasi kishte dhënë vendimin.

“Martoj vajzën dhe jam i lumtur. Mezi e pres atë ditë”-mësohet të kenë qenë fjalët e fundit të gjyqtarit.

Diskutohet që për lamtumirën e fundit për gjyqtarin e ndjerë të mbahet ceremoni shtetërore ditën e mërkurë. Versus.al

Rakip Kurtaj

Në media është publikuar foto e Rakip kurtajt, 65 vjeçari i cili mbeti i plagosur ditën e djeshme në sallën e Gjykatës së Apelit ku u ekzekutua gjyqtari Astrit Kalaja. 65 vjeçari së bashku me djalin e tij Ervis Kurtaj, 45 vjeç i cili po ashtu mbeti i plagosur, ishin palë kundërshtare në gjyq me Gjon Shkambin, xhaxhain e autorit që kreu ngjarjen e rëndë.

Kurtaj mori plagë të lehta në kraharor dhe këmbë ndërsa djali i tij në dorë. Të dy u transferuan në Spitalin e Traumës për ndihmë mjekësore ku ndodhen jashtë rreziku për jetën. Versus.al

Autori Elvis Shkambi, gjyqtari i ndjerë Astrit Kalaja

I gjithë vendi u trondit ditën e djeshme pasi gjyqtari Astrit Kalaja u ekzekutua brenda sallës së gjykatës së Apelit në Tiranë. Autori, Elvis Shkambi 30 vjeç, me të dëgjuar vendimin e tij që binte ndesh me interesat e familjarit të tij, xhaxhait Gjon Shkambi, nxorri pistoletën tip “Berreta” dhe e qëlloi tre herë në gjoks duke i shkaktuar vdekjen.

Të plagosur mbetën edhe babë e bir, Rakip dhe Ervis Kurtaj, pjesë e palës kundërshtare në këtë proces që kishte nisur në gjykatën e Shkodrës për një pronë të cilën Gjon Shkambi pretendonte se ia kishte lënë trashëgimi i ati pavarësisht se aty ishin ndërtuar godina për strehimin e disa familjeve të tjera.

Ngjarja e paprecedentë shkaktoi tronditje të madhe duke bërë që institucionet e vendit të reagonin me forcë duke kërkuar marrjen e masave që tragjedi të tilla të mos përsëriten më kurrë.

Mësohet se si pasojë e ngjarjes së ndodhur ditën e djeshme, sot në Gjykatën e Apelit do të pezullohen të gjitha gjyqet. Do të hidhet shorti për 12 masa sigurie të cilat pritej t’i jepte të gjitha gjyqtari që u vra brenda sallës së gjyqit.

Kalaja ishte pjesë e trupës gjykuese së bashku me Gilda Hoxhën dhe Enkelejda Bajon. Pasi ishte dhënë vendimi i djeshëm, dy gjyqtaret kishin dalë nga salla e gjyqit, ndërsa viktima Kalaja po mblidhte dosjen menjëherë pasi kishte vulosur qëndrimin final. Këtë e konfirmon në dëshminë e saj edhe sekretarja që ishte e pranishme. Versus.al