Ajo që duhej të ishte një përvojë argëtuese zhytjeje për familjen Burrows në Florida Keys, përfundoi në një incident dramatik. Richard, një djalë 8-vjeçar, u sulmua papritur nga një peshkaqen, duke marrë plagë të rënda në këmbë.
Në ato çaste të frikshme, motra e tij Rose, vetëm 10 vjeç, tregoi guxim dhe përqendrim të jashtëzakonshëm. Pa humbur kohë, ajo e nxori vëllain nga uji dhe vendosi një rrip, duke ndihmuar në ndalimin e gjakderdhjes deri në mbërritjen e ndihmës së shpejtë.
Sipas kapitenit të zjarrfikësve Chris Jones, ndërhyrja e menjëhershme e Rose ka qenë vendimtare: “Vënia dhe mbajtja e rripit bëri diferencën mes një shërimi të plotë dhe një pasoje të përhershme”, tha ai. “Pa Rose, kjo histori do të kishte pasur një fund tjetër.”
Pas mbërritjes në breg, Richard u transportua me helikopter drejt qendrës traumatike Ryder në Miami, ku mjekët arritën t’i shpëtonin këmbën. Sipas familjes, ai është në gjendje të mirë dhe po forcohet çdo ditë e më shumë.
“Richard po rikuperohet dhe është me moral të lartë. Shpresojmë që shumë shpejt të mund të zhytet sërish në oqean — së bashku me motrën e tij trimëreshë”, thuhet në deklaratën e familjes.
Veprimi i Rose ka prekur zemrat e shumë njerëzve në SHBA dhe më gjerë. Përdoruesit në rrjete sociale e kanë quajtur “heroinë të vërtetë” dhe një shembull frymëzues për të gjithë.
