Në mëngjesin e hershëm të së enjtes, 27 nëntor një shpërthim i fuqishëm tronditi rrugën Euler në Düsseldorf, Gjermani ndërsa hyrja e një pallati u shkatërrua plotësisht.
Sipas hetimeve të medias gjermane BILD, rezulton se pallati i përket reperit shqiptar Azet!
Për shkak se rrënojat bllokuan rrugën e daljes përmes shkallëve, zjarrfikësit detyruan dhjetë persona të dalin nga apartamentet përmes dritareve duke përdorur shkallët e lëvizshme.
Nuk është ende e qartë kujt iu drejtua sulmi. A ishte reperi Azet objekti i tij, apo thjesht rastësi që pikërisht ky pallat i përkiste portofolit të tij të pasurive të patundshme? Prokurorja Janne Jakobek konfirmoi për BILD: “Pallati i banimit i përket muzikantit. Po hetojmë për shkaktim të shpërthimit me eksploziv.”
Menjëherë pas raportimeve, Azet zgjodhi të sqarojë situatën përmes një deklarate në Instagram, duke mohuar kategorikisht se ai ka qenë shënjestër e ndonjë atentati.
Ai theksoi:
“Nuk ka pasur asnjë atentat ndaj meje. Unë kam disa prona, përkatësisht banesa kolektive. I prekur ka qenë një nga këto objekte, unë vetë nuk banoj aty. Ngjarja nuk ka lidhje me mua.”
Muzikanti ka investuar prej vitesh në pasuri të patundshme dhe është drejtor i kompanisë Musa Immobilien GmbH, me seli në Monheim am Rhein (NRW).
Azet (29 vjeç, emri i vërtetë Granit Musa) është gjithashtu anëtar themelues i grupit të hip-hop-it KMN-Gang në Dresden./Versus.al
