Fundjavën që shkoi fansat e futbollit u shokuan gjatë ndeshjes Fiorentina Inter, kur mesfushori i “violëve” Eduardo Bove ra pa ndjenja në fushën e lojës.
Ndeshja u pezullua, ndërsa të gjithë mbetën të shqetësuar për gjendjen e mesfushorit i cili u përmend më vonë në spital. Sipas mediave të huaja, ai menjëherë kishte pyetur se çfarë ndodhi në ndeshjet e tjera të Serie A dhe kur do të mund të rikthehej në fushën e lojës.
“Çfarë ndodhi në Juve-Lecce? Ku mund ta shoh Romën? Kur mund të kthehem në fushë?”, ishin disa nga pyetjet që Bove bëri pasi u zgjua.
Mesfushori do të vijojë të qëndrojë në spital, ndërsa nëse gjatë 24 orëve të ardhshme konfirmohen përmirësimet në gjendjen e tij, atëherë do të zhvendoset në departamentin e thjeshtë të Kardiokirurgjisë.
Të gjitha testet tashmë janë fokusuar ekskluzivisht në zemër, si në rastin e asaj që ndodhi në fushë, ashtu edhe në raste që mund t’i kenë ndodhur më përpara.
Duke përjashtuar çdo problem neurologjik (përfshirë atakun epileptik, të identifikuar me nxitim nga dikush pasditen e së dielës), mjekët po përpiqen të kuptojnë arsyet e vërteta që çuan në sulmin në zemër në Artemio Franchi. Versus.al
