Heidi Baçi, ish-banorja e njohur e “Big Brother VIP 3”, është gati për t’u rikthyer në Shqipëri. Arsyeja e rikthimit të saj nuk lidhet me ish-partnerin Romeo Veshaj, por me rolin e saj të ri si moderatore e programit “Big Brother VIP Fan Club”.
Së fundmi, Heidi njoftoi largimin e saj nga emisioni “Goca dhe Gra” për t’i kushtuar më shumë kohë vetes në një periudhë të vështirë për të. Ajo theksoi se arsyet e largimit ishin të natyrës personale dhe se kishte nevojë për të rikuperuar veten. Tani, duket se ajo ka lënë prapa momentet e vështira.
Ndërkohë, është konfirmuar se sezoni i katërt i “Big Brother Albania VIP” do të fillojë më 21 dhjetor. Megjithëse lista përfundimtare e banorëve ende nuk është publikuar nga Top Channel, janë përfolur disa emra të njohur që pritet të marrin pjesë.
Në listë përmenden këngëtarja Anila Mimani, aktori Akil Varfi nga “Portokallia” dhe influencerja Sara Hoxha, e cila ka qenë gjithashtu ish-bashkëshorte e Ledri Vulës. Një tjetër emër që ka dalë në pah është ai i futbollistit Eros Grezda. Këto përfolje kanë krijuar një atmosferë pritjeje dhe emocionuese për sezonin e ri të Big Brother./Versus.al
