Pesë vjet pas zjarrit që shkatërroi katedralen historike të Francës, Notre Dame po përgatitet të rihapë dyert e saj. Me afrimin e datës së hapjes së 7 dhjetorit, qindra parizianë kanë shoqëruar statujën e Virgjëreshës Mari në kthimin e saj në katedrale.
Kryepeshkopi i Parisit bekoi statujën e Virgjëreshës Mari: “Virgjëresha Mari qëndron në këmbë, megjithëse është e mbushur me dhimbje. Sapo e shoqëruam në shëtitjen e saj, në kthimin e saj, duke recituar librin e lutjeve dhe misteret e gëzueshme. Ne mbetemi të lumtur për gjithçka që ndodhi pas këtij zjarri. Ne mbetemi të lumtur për gjithçka që kemi përjetuar rreth kësaj katedrale gjatë pesë viteve të fundit”. Qindra besimtarë shëtitën rrugëve të Parisit dhe kënduan himne kishtare.
Notre Dame pritet të hapet më 7 dhjetor. Një ditë më vonë, të dielën, më 8 dhjetor, do të mbahet liturgjia e parë.
Me 15 milionë vizitorë në vit, Katedralja Notre Dame konsiderohet një nga atraksionet kryesore të kryeqytetit francez.
Rihapja e Notre Dame do të shoqërohet me një sërë veçorish të reja: një oborr tërësisht i ridizajnuar, rezervime falas për të kufizuar fluksin e vizitorëve dhe një rrugë turne për të zbuluar thesaret e restauruara.
