Banorët e Floridës, Tenesit dhe Karolinës së Jugut janë bllokuar nga faqja e internetit Pornhub që nga sot, pasi kompania zgjeroi nga 1 janari 2025 listën e shteteve që, për shkak të ligjeve të tyre, nuk mund të hyjnë më në faqen e njohur pornografike.
Sipas faqes Florida Politics, Aylo (kompania mëmë e Pornhub) e ndërmori këtë veprim në shenjë proteste ndaj rregulloreve të verifikimit të moshës të vendosura nga legjislacioni i ri në këto shtete duke filluar nga viti i ri.
"Për të qenë të qartë, duke bllokuar hyrjen në këto shtete, ne jemi në përputhje të plotë me ligjin," tha një zëdhënës i Aylo në një email.
Guvernatori Ron DeSandis nënshkroi një projekt-ligj të ri marsin e kaluar që do të kërkonte që faqet e internetit me përmbajtje pornografike ose përmbajtje të tjera që konsiderohen "të dëmshme për të miturit" të përdorin verifikimin e moshës nga palët e treta përpara se përdoruesit të kenë akses në material.
Aylo argumenton se ligji i ri në Florida vendos një barrë të padrejtë në faqet e internetit pornografike. Përfaqësuesi i kompanisë thekson se Aylo mbështet kërkesat e verifikimit të moshës, por beson se verifikime të tilla duhet të bëhen në nivel pajisjeje, p.sh. përmes dyqaneve të aplikacioneve, pasi do të ketë më pak rreziqe sigurie dhe privatësie sesa një metodë që i detyron përdoruesit të ngarkojnë dokumente identiteti në internet.
Shumë shtete në vitet e fundit kanë vendosur tashmë kërkesa verifikimi në faqet pornografike. Në fakt, Aylo tashmë bllokon hyrjen në Pornhub në 14 shtete të tjera me ligje të ndryshme: Virginia, Montana, Karolina e Veriut, Arkansas, Utah, Misisipi, Teksas, Nebraska, Idaho, Kansas, Kentaki, Indiana, Alabama dhe Oklahoma. Shtimi i tre shteteve që nga janari do të thotë që përdoruesit e internetit në 17 shtete nuk do të jenë më në gjendje të hyjnë në faqe.
