Babai i superyllit të ri të futbollit spanjoll Lamine Yamal është vënë në qendër të mediave botërore pas një sulmi me thikë mbrëmjen e së mërkurës (14 gusht).
32 vjeçari Mounir Nsraoui i cili ndodhet në spital pasi u godit të paktën tre herë me thikë, ka lindur në Marok dhe u bë baba në moshë të re me partneren e tij të atëhershme Sheila Elbana, nëna e Yamal para se të ndaheshin dy vjet pas lindjes së djalit të tyre.
Nasraoui, sipas mediave spanjolle, ka shfrytëzuar në maksimum famën e djalit të tij.
Ai ka mbushur instagramin e tij me fotot e tyre të përbashkëta ndërsa në deklaratat e tij shprehet se është idhulli i tij.
“E dija që në momentin që lindi se do të bëhej një yll”, tha ai disa javë më parë.
Por siç duket jeta e babait të yllit të Barcelonës nuk është e lehtë.
Sipas gazetës ARA Nasraoui nuk ka një punë stabël në Spanjë dhe herë pas herë shkon e vjen nga Maroku ndërsa vëllai i tij dhe xhaxhai i futbollistit spanjoll zotëron një furrë buke në zonën e Rokafondës ku Yamal lindi.
Jeta e Nasraëi nuk ka kaluar dhe pa tensione pasi në vitin 2023 ai u dënua me 546 euro gjobë pasi sulmoi tendën e partisë së së ekstremit të djathtë të Spanjës, VOX dhe goditi kandidatën e kësaj partie në qytetin e Mataro.
Madje në disa video, ai shihet duke i quajtur mbështetësit e Vox-it "bij kurve".
Ndërsa në Gjykatë babai i Yamal kishte kërkuar falje duke thënë:
“Edhe unë jam njeri. Atë ditë djali im po udhëtonte për në Hungari me kombëtaren spanjolle dhe këta njerëz ishin mbledhur jashtë një shkolle ku ka fëmijë nga vende të ndryshme të botës. Ne duhet ta duam dhe ta ndihmojmë njëri-tjetrin. Nëna ime ka paguar taksa për 50 vjet dhe gjyshi ka shërbyer si ushtar këtu. Ata nuk kanë të drejtë të më thonë 'kthehu në vendin tënd' sepse vendi im është këtu në Spanjë”
Kërcënimet nga marokenët
Pavarësisht se ka lindur në Marok , Nasraoui ka qenë gjithmonë krenar që djali i tij garon me ngjyrat e Spanjës.
Ai ishte gjithashtu një nga mbështetësit më të mëdhenj të Spanjës në rrugën e tij për të fituar Euron e këtij viti pa humbur asnjë ndeshje.
Ky qëndrim i Nasraoui, i kombinuar me vendimin e qartë të Yamal për të konkurruar me Spanjën në vend të Marokut, vendi i origjinës së babait të tij, shkaktoi një reagim në vendin afrikan.
Siç tha një mik i familjes, "veçanërisht që kur Yamal vendosi të luante për Spanjën, babai i tij mori shumë postime urrejtjeje nga marokenët sepse ata e shihnin atë si një tradhti ndaj vendit të tyre".
