Detaje të reja janë zbardhur nga hetimet për atentatin mafioz të ndodhur më 30 tetor në Dobraç të Shkodrës ku u ekzekutuan me breshëri plumbash Hamza Lici dhe Arlind Bushati, mjeti i të cilëve përplasi më pas për vdekje çiftin e bashkëshortëve, Flutura dhe Bashkim Basha.
Policia ka dyshime se Ibrahim Lici i njohur si “Braqja” është personazhi “misterioz” që shfaqet në videon e publikuar në rrjetet sociale ku duket i tronditur dhe sipas dëshmitarëve edhe ka tentuar të rikthejë në jetë 23 vjeçarin Hamza Lici duke i bërë frymëmarrje artificiale.
Dyshohet se i shumëkërkuari, ka mbetur i plagosur me 2 plumba gjatë breshërisë së plumbave që autorët lëshuan drejt tyre. Policia ka zhvilluar kontrolle në Vlorë dhe Fier pasi dyshimet janë se po mjekohet në një klinikë private në jug të vendit, por deri më tani nuk ka asnjë rezultat nga këto kërkime të kryera.
Nëse vërtetohet dyshimi i policisë, atëherë lind pyetja: Si arriti i shumëkërkuari për vrasje Ibrahim Lici të hynte në Shqipëri pa u dalluar nga askush kur mendohej se gjendej në Turqi në arrati për vrasjen e Endri Mustafës, ngjarje të cilën fisi Lici pretendon se është inskenuar për fajësimin e Ibrahimit. Versus.al
