Këtë të mërkurë, në Kryesinë e Kuvendit të Shqipërisë, u organizua një tryezë e rëndësishme për të diskutuar mbi dhunën ndaj grave në mjedisin dixhital. Zv.kryeministrja Belinda Balluku ishte e pranishme si e ftuar, dhe gjatë fjalës së saj theksoi se çdo njëra prej pjesëmarrësve në këtë ngjarje është një viktimë e ndarjeve gjinore, jo vetëm në hapësirën dixhitale, por edhe në jetën e përditshme.
Ajo gjithashtu komentoi një deklaratë të bërë nga ish-kryeministri Sali Berisha një ditë më parë, ku ai e kishte përshkruar qëndrimin e tij në parlament si të vështirë "për shkak të përzierjes së aromave të parfumeve të shtrenjta."
Balluku i dha përgjigje asaj që tha Berisha, duke deklaruar se deputetet nuk janë aty për aromat e parfumeve, dhe se ajo nuk beson se dikush mund të zgjedhë cila është më e shtrenjta. Sipas zv.kryeministres, çmimet e aromave që ata përdorin janë shumë të ndryshme, duke filluar nga ato më të përballueshmet.
“Sot shikoja lajmet dhe pavarësisht se unë dje dhe koleget e mia kemi qenë në seancën parlamentare na merr dhe ne ajo rutina dhe ca gjëra i dëgjojmë, ca nuk i dëgjojmë. Po dëgjoja prononcime e copëza të ndryshme të mediave.
Dëgjoja kolegët tanë deputetë, nuk po i ndaj majtas apo djathtas, se ka pak rëndësi, sot këtu jemi të gjithë bashkë, tek flisnin që ajo sallë ka erë parfumesh të shtrenjta. Se zakonisht gratë janë ato që mbajnë parfume apo akuzohen për parfume.
Unë nuk e di që në sallën parlamentare ne kemi hyrë që të na mbajnë erë parfumet të cilat kushtojnë nga 100 lekë edhe shumë më shumë, por nuk e di kush i ka këto aftësi nuhatjeje për t’i ndarë se sa të shtrenjta janë dhe pastaj e thënë nga ai që po e thoshte nuk besoj që e ka këtë nuhatje në këtë moshë”, u shpreh Balluku.
Gjithashtu, zv.kryeministrja Belinda Balluku komentoi edhe mbi qëndrimet e disa kolegëve të saj deputetë, të cilët, siç tha ajo, shumë herë e kanë reduktuar vlerën e grave në parlament duke ju referuar vetëm pamjes së tyre. Balluku theksoi se pamja fizike e deputeteve nuk është e rëndësishme; ajo theksoi se ajo që ka vlerë është roli dhe kontributi i tyre në procesin legjislativ.
Duke iu referuar detyrës së saj si ministre e Infrastrukturës dhe Energjisë, ajo përmendi përkushtimin e saj për të qenë aktive në terren, duke veshur çizmet dhe duke vizituar kantieret e ndërtimit. Ajo e përshkroi këtë si një mënyrë për të provuar se është e gatshme të marrë përsipër punë të vështira, të cilat tradicionalisht janë konsideruar si “punë burrash”. Balluku u shpreh se përkushtimi dhe aftësia në detyrat e saj janë ato që dëshmojnë vlerën e saj si një lider dhe si grua në politikë.
“Ose dje kam dëgjuar një tjetër përfaqësues të politikës që tregonte se si ka ndryshuar disa prej grave të parlamentit në pamjen e tyre. Nuk e di se çfarë rëndësie ka pamja në rolet që kemi në parlament. Nuk e di sa e rëndësishme është pamja e një drejtuesi komisioni?
Nuk e di sa e rëndësishme është pamja ime sepse unë vesh çizmet dhe i futem baltës nëpër kantiere dhe bëj punë burrash. Supozohet se është punë burrash se ne këtu kemi profesoreshën që vjen nga një fushë e supozuar burrash, inxhinieria e ndërtimit”, tha Balluku./Versus.al
