Në Tiranë u mbajt sot takimi inagurues i Komitetit të Përbashkët Konsultativ me Komitetin Ekonomik dhe Social të BE. Të pranishëm ishin zyrtarë të ndryshëm të këtyre organizatave, ambasadori i BE dhe kryeministri Edi Rama.
Ky i fundit pati një përgjigjie ndaj atyre të cilët e cilësojnë “propagandë” retorikën e tij për mundësinë e anëtarësimit të vendit në Bashkimin Evopian.
“Këta njerëz nuk janë të mirëinformuar që Mali i Zi i ka çelur negociatat që në 2012-ën, Serbia në 2014-ën dhe sot e gjejmë veten në pararojë pasi çelëm negociatat vitin e kaluar dhe këtë vit kemi shans të mirë të hapim të gjithë grupkapitujt”- tha Rama.
Ndërsa më tej nuk kurseu batutat për presidentin e kreut të komitetit Oliver Ropke. Rama tha se në rast se do të ishte në rolin e sindikalistëve, do i hapte shumë probleme qeverisë.
“Është moment në kohë me të cilin ne duhet të merremi dhe nuk mund të jem më mirënjohës se kaq për presidentin dhe ekipin e tij që kanë një buzëqeshje krejt ndryshe nga buzëqeshja tipike e Brukselit mbase sepse punojnë me pjesën më të lirë të shoqërisë europiane. Shoqëria civile, sindikatat… duhet të jetë shumë interesante të jesh sindikalist sepse mund të thuash çdo gjë të keqe për qeverinë, por nuk e ke për detyrë të ndreqësh asgjë të cilën qeveria e ka për detyrë. Do doja të isha një sindikalist, jam i sigurt që do isha dhimbja më e madhe e kokës e qeverisë që drejtohet nga unë”- shtoi kryeministri. Versus.al
