Ministri i Brendshëm Taulant Balla gjatë seancës së sotme plenare ka prezantuar propozimin për ndryshimet në projektligjin e sistemit të adresave me qëllim përmirësimin e sistemit në tërësi dhe thjeshtimit të punës së institucioneve.
Balla tha se me ndryshimet e reja në sistemin e adresave, institucionet do ta kenë detyrim ligjor për të pasur vetëm një regjistër ku të referohen ndërsa bëri thirrje që kushdo që kërkon të gjejë me saktësi një adresë të drejtohet në faqen online “adrestari.mb.gov.al”.
"Me ndryshimet e propozuara sot do shkojmë edhe më tej, aty ku na duhet të ishim shumë vite më parë. Të kemi një regjistër unik adresash në rang vendi ku do kenë detyrimin ligjor që t’i referohen të gjitha institucionet. Nuk ka më që OSHEE të ketë regjistrin e vetë, bashkia të ketë të vetin apo Kadastra të vetin. Regjistri aktual unik është në funksion. Aktualisht kushdo prej jush shkoni në faqen adrestari.mb.gov.al dhe mund të shikoni punën e bërë. Po punohet për të pasur një faqe të re më interactive që do jetë gati për pak javë. Do u kërkoja qytetarëve që të shkojnë tek adrestari.mb.gov.al kur të duan të gjejnë një adresë”- tha Balla.
Sipas Ballës, Shqipëria bëhet vendi i parë në Ballkan me këtë sistem adresash ku çdo banesë apo adresë e caktuar do të ketë një kod unik nëpërmjet së cilës do t’i gjendet vendndodhja shumë lehtë duke shkurtuar kohë për instititucionet, bizneset dhe qytetarët apo vizitorët e huaj në vend.
“Nëse më parë ishim një prej vendeve më të prapambetura në Ballkan për sistemin e adresave, do jemi vendi i parë në ballkan sa i përket këtij sistemi me kod unik adresash. Objektivat e këtij projektligji janë tepër të rëndësishme sepse mbyllëm një faqe të tejzgjatur të tranzicionit por është edhe shkurtim kohe për institucionet për të dërguar me postë një shërbim, për bizneset, për qytetarët. Mos harroni Shqipëria po bëhet destinacion i rëndësishëm turistik ku shumë prej turistëve e kanë të vështirë të gjejnë shtëpinë e prenotuar. Me këtë kod duke e vendosur qoftë te taksisti qoftë te telefoni mbërrin shumë më shpejt në destinacion”- shtoi ministri.
Ai theksoi gjithashtu se janë rritur penalizimet ndaj kryetarëve të bashkive për njësitë vendore të cilat nuk kanë zbatuar ligjin për emërtimet e rrugëve. Versus.al
