Këshilli i Ministrave zhvilloi sot mbledhjen e përjavshme duke marrë disa vendime në fusha të ndryshme. Ministri i Mbrojtjes, Ermal Nufi bëri me dije se qeveria kishte miratuar projektvendimin që lidhet me përcaktimin e kritereve të kompensimit të transportit të ushtarakëve aktivë.
Sipas tij, ky VKM i shërben synimit të vendit që në 2029-ën të përafrohet me mesataren e vendeve të NATO-s sa i takon pagave për ushtarakët në nivelin bazë dhe atë komandues.
“Sot në mbledhjen e këshillit të ministrave miratuam një VKM që lidhet me përcaktimin e kritereve dhe masave të kompensimit të transportit të ushtarakëve aktiv të FA. Në zbatim të ligjit shohim efekte financiare që përballohen nga buxheti i ministrisë së Mbrojtjes. Ky projektvendim përkthehet në kushte më dinjitoze për ushtarakët tanë që na përfaqësojnë këtu dhe në misionet e huaja.
Ky hap është në përputhje edhe me politikat e tjera të qeverisë, rritjen e pagave. Nga të dhënat e INSTAT-it, rritja e pagave në fund të vitit të kaluar është regjistruar në pikën më të lartë në FA me 10.6%. Me këtë vendim i afrohemi qëllimit tonë që në vitin 2029 të arrijmë mesataren e vendeve të NATO-s me një rritje me 67% për nivelet bazë dhe 37% për nivelet bazë të komandimit. Sot Shqipëria është një nga vendet me pagë mesatare ndër më të lartat në rajon dhe kjo është gjë që na bën krenarë”- u shpreh Nufi.
Sa i takon shqetësimeve të Serbisë për marrëveshjen mes Shqipërisë, Kosovës e Kroacisë në fushën e bashkëpunimit ushtarak, Nufi tha se vendi ynë thjesht po zbaton kriteret e NATO-s në përputhje të plotë me sugjerimet e aleatëve. Versus.al
