Kryeministri Edi Rama vendosi t’i përgjigjej këtë të shtunë një komenti me nota ironie të një komentuesi në profilin e tij, në rubrikën e tij “Sy m’Sy”.
'Çfarë e duam ne BE-në mor piktor, ne po ikim pa pasaporta…”, ishte komenti për të cilin kreu i qeverisë u përgjigj se pasaporta europiane duhet jo vetëm për të realizuar një ëndërr të hershme, por edhe për të çuar në vend dinjitetin e shqiptarëve.
“I dashur Kristi, kur thua mor piktor, e thua për të treguar se ke të drejtë? Se mendon se nuk të duhet pasaporta europiane e Shqipërisë, meqë sipas teje ne po ikim pa pasaporta?! Pasaporta europiane nuk duhet për të ikur, se për të ikur, ikën…Edhe me këtë që kemi! Ke të drejtë! Pasaporta europiane duhet për të fituar më në fund dinjitetin e qytetarit të barabartë europian. Dinjitetin e udhëtarit europiane që nuk e nxjerin anash në çdo hyrje të BE-së për ta pyetur me polic, ku po shkon? Dinjitetin e studentit europian, dinjitetin e punëmarrësit europian, e njeriut të lirë, të barabartë që gëzon çdo të drejtë europiane dhe çdo mundësi të ofruar nga rrjeti i solidaritetit europian. Pak janë këto?! Tani, të përçmosh punën e tjetrit është kollaj, por nuk të ndihmon të jetosh më mirë. Përkundrazi, gjyshja ime thoshte, mllefi e zeza e të zotë!”, u shpreh Rama.
Më tej, i bëri thirrje qytetarit që më 11 Maj të votojë Partinë Socialiste.
“Shqipërinë po e ndryshojmë përditë. Ndaj voto 5-ën pa asnjë pishman, e vetmja gjë me vlerë që mund të bësh. Përtej vërejtjeve, kritikave dhe mospëlqimeve sepse vetëm unë, PS bashkë me ty dhe shumicën e shqiptarëve mund ta bëjmë këtë kapërcim epokal e historik për vendin dhe ta ulim në tryezën europiane, ëndërr e vjetër dhe amanet po kaq i vjetër”, përfundoi Rama./Versus.al
