Pas lirimit nga 'arresti shtëpiak' i kreut të partisë Demokratike Sali Berisha ka reaguar Prokuroria e Posaçme Kundër Korrupsionit dhe Krimit të Organizuar (SPAK).
SPAK ka njoftuar se pasi të njihet me vendimin me vendimin e zbardhur nga GJKKO do të ankimojë çështjen në Gjykatën e Posaçme të Apelit.
Prokuroria shtoi se ndërkohë seanca paraprake për gjykimin në themel të çështjes vazhdon në Gjykatën e Posaçme të Shkallës së Parë për Korrupsionin dhe Krimin e Organizuar.
“Pasi Prokuroria e Posaçme të njihet me vendimin e zbardhur të Gjykatës së Posaçme të Shkallës së Parë kundër Korrupsionit dhe Krimit të Organizuar do të vijojë procedurën e ankimimit në Gjykatën e Posaçme të Apelit. Ndërkohë seanca paraprake për gjykimin në themel të çështjes vazhdon në Gjykatën e Posaçme të Shkallës së Parë për Korrupsionin dhe Krimin e Organizuar”, thuhet në reagimin e SPAK.
Pas rreth 11 muajsh nga vendimi që e mbylli në katin e 8-të të banesës nga ku prej kohësh mban fjalimet e tij, tashmë kryedemokrati është i lirë.
Menjëherë pas vendimit, Berisha është rikthyer në selinë blu nga ku mbajti dhe një fjalim para qindra mbështetësve të tij.
Vendimi u mor sot nga gjyqtarja Flojera Davidhi gjatë seancës në Gjykatën e Posaçme ku u revokua masa e sigurisë “arrest shtëpie”. Prokuroria e Posaçme (SPAK) ishte kundër, duke kërkuar që masa ndaj kryedemokratit të mbetet në fuqi./Versus.al
