Në inagurimin e Urës së Madhe të Kukësit ditën e sotme ishin të pranishëm kryeministri Edi Rama dhe zëvendëskryeministrja, njëherësh Ministër i Infrastrukturës dhe Energjisë, Belinda Balluku.
Kryeministri është përshendetur me qytetarët që kishin ardhur në inagurim, ndërsa është pritur me këngë e vallë nga banorët e qytetit verilindor.
Gjatë inagurimit nuk munguan as batutat nga kreu i qeverisë për liderin e Partisë Demokratike, Sali Berishën duke u shprehur se ura është e hapur dhe për ata që dhanë lajmin nga penxherja që iu këputen këmbët urës, kur ndërkohë nuk ka fare.
“Tani është shumë e rëndësishme që ura hapet edhe hapet për të gjithë, edhe për ata që ç’nuk thanë për urën, deri tek lajmi nga penxherja që iu këputën këmbët urës, s’ka këmbe, e ka trupin të shtirë përgjatë një hapësire drite që është nga më të mëdhatë, hapësira drite të një ure në Europë. Falë dhe talentit dhe nuk diskutohet eksperiencës së projektuesit italian, por falë dhe punës së bërë nga kompania.
Dhe ndërkohë pasi ura mbaroi duheshin plotësuar dhe kushtet për dy a tre komunitete të tjera rreth kësaj zone, të cilave u duhej dhënë akses në mënyrë që të garantohej lehtësia e transportit për ta. Kështu që sot jemi ne ditën e bukur me diell të hapjes së urës.
Gjëja që duhet kuptuar, vetëm se kush s’do ta kuptojë s’ka për ta kuptuar, është ekzakt kjo, që nga pikëpamja e trasesë rruga ishte hapur me këto ngërçet e tmerrshme këtu në hyrje te qytetit të Kukësit dhe në zonën ku u ndërtuan ato urat e tjera, por nga pikëpamja e volumeve dhe e garancive e standardeve ishte bërë vetëm gjysma e volumit të punës.” u shpreh Rama gjatë inagurimit të urës.
Ndërsa zëvëndëskryeministrja Belinda Balluku e cilësoi urën si një vepër arti. Ministrja Balluku shtoi se në mungesë të kësaj ure i gjithë trafiku kalonte në një urë të ndërtuar në vitin 1978 dhe se kjo pjesë ishte lënë komplet jashtë vëmëndjes.
''Jemi në një moment shumë të rëndësishëm përsa i përket infrastrukturës sidomos asaj të Rrugës së Kombit. Sot jemi gati për të hapur trafikun në këtë zonë. Ura është një vepër arti pasi është projektuar dhe nga arkitekti italian, Xhorxhio Rizo. Kur e kemi marrë në dorëzim nuk ka qenë as në gjysëm të volumeve dhe në vazhdojmë në përmisimin e saj. E rëndësishmë është se dua të them gjatë këtyre viteve në mungesë të urës i gjithë trafiku kalonte në një urë të ndërtuar në 1978 para ndërtimit të Digës së Fierzës dhe kjo pjesë ishte lënë komplet jashtë vëmëndjes kështu që puna e bërë nga viti 2020 dhe deri më sot ka qenë një punë kolosale për këtë urë dhe për të gjithë kompletimin e ‘Rrugës së Kombit.’' u shpreh zv/kryeministrja Balluku. /Versus.al
