Partia Demokratike ka dorëzuar në Kuvend kërkesën për interpelancë urgjente me kryeministrin Edi Rama lidhur me skandalin e publikuar së fundmi për transportin ndërkombëtar të 800 ton mbetjeve toksike nga Porti i Durrësit në Tajlandë.
Në kërkesë thuhet se në këtë rast kemi të bëjmë me neglizhim të institucioneve dhe kërkohet që qeveria të dorëzojë në Kuvend informacion që informon deputetët lidhur me rastin. Duke e cilësuar mundësinë e kthimit të 1600 ton mbetjeve drejt vendit tonë, grupi parlamentar i PD thekson se kjo do të rrezikojë shëndetin e qytetarëve dh sigurinë kombëtare.
"Kjo tregon se nuk kemi të bëjmë me një ngjarje të izoluar, por me një aktivitet të mirëfilltë kriminal, që përfshinë përgjegjësi për veprime ta paligjshme apo mosveprime të disa autoriteteve shtetërore në varësinë e Këshillit të Ministrave, si dhe një mungesë neglizhence kriminale të mbikëqyrjes së aktivitetit të paligjshëm të disa subjekteve tregtare private, të identifikuara deri më tani kompanitë “Kurum International” sh.a. dhe “Sokolaj” sh.p.k.
Për këtë shkak, vetëm për dy ngarkesat e identifikuara rezulton se në Shqipëri do të rikthehet një sasi në minimum prej rreth 1600 ton mbetjesh toksike, të patrajtuara dhe të papërpunuara, që rrezikojnë të kanosin jetën dhe shëndetin e qytetarëve dhe pa dyshim sigurinë kombëtare"- thuhet në kërkesë.
Në vijim, PD pretendon se kompanitë Kurum kanë shkelur ligjin për përpunimin e mbetjeve toksike dhe për transportin e tyre nga Porti i Durrësit.
"Kompania “Kurum International” sh.a. ka shkelur ligjin për mënyrën e përpunimit të mbetjeve të rrezikshme që prodhon, ndërkohë që kompania “Sokolaj” sh.p.k. ka shkelur ligjin lidhur me transportin e mbetjeve toksike të rrezikshme.
· Autoritetet përgjegjëse kanë shkelur ligjin duke mosvepruar ndaj këtyre shoqërive private për përpunimin apo transportin e mbetjeve toksike, si dhe duke lejuar eksportin e tyre jashtë territorit në shkelje të ligjeve të vendit dhe konventave ndërkombëtare.
· Nga ana tjetër, Qeveria dhe autoritetet përgjegjëse heshtin prej 3 javësh dhe nuk veprojnë duke mos bërë asnjë transparencë mbi këtë çështje, ndërkohë që skandali ka marrë përmasa kombëtare dhe ndërkombëtare.
Duhet menjëherë dhe pa asnjë vonesë që Qeveria Shqiptare të informojë Kuvendin e Shqipërisë, dhe përmes tij edhe opinionin publik se për çfarë bëhet fjalë, kujt i përkasin mbetjet e rrezikshme, si janë krijuar apo kanë mbërritur në Shqipëri, si janë trajtuar, cfarë veprimesh, kontrollesh apo aktesh mbikëqyrëse kanë ndërmarrë institucionet, si janë lejuar të eksportohen pa lejet përkatëse nga Porti i Durrësit, kush i ka lejuar të futen dhe të dalin prej territorit të Republikës së Shqipërisë, nga dhe përmes Portit të Durrësit, etj. Në këtë rast mungesa e transparencës nga ana e Qeverisë shton edhe më shumë pasigurinë për jetën e qytetarëve shqiptarë dhe mbi të gjitha dyshimet për një aktivitet kriminal me leje shtetërore, që rrezikon sigurinë kombëtare të një vendi anëtar të NATO-s"- theksohet më tej në kërkesën e PD.
Çështja e transportit të mbetjeve toksike është kthyer në diskutim kombëtar pasi kompania Kurum shkarkoi nga puna 500 punonjës pas marrjes nën hetim nga prokuroria. Zv.kryeministrja Belinda Balluku e pyetur nga gazetarët tha se përgjegjësia është e koncesionarit që duhet të zbatojë kodet dhe procedurat e BE. Versus.al
