Bashkëkryetari i komisionit të Reformës Zgjedhore, Damian Gjiknuri deklaroi sot nga foltorja e Kuvendit se Partia Socialiste e ka gati një projektligj që mundëson votën e Diasporës në zgjedhjet parlamentare të vitit 2025.
Shpjegimi i tij u bazua në elementet teknikë, duke treguar se qytetarët që jetojnë jashtë do të kenë mundësi të regjistrohen elektronikisht si votues dhe më pas materialet me fletën e votimit do të dërgohen nga shteti me postë. Pasi të kryhen votimet, materialet do të mbërrijnë në Shqipëri deri në ditën e votimit dhe më pas do të numërohen sipas qarqeve ku emigrantët rezultojnë banorë.
“Në kushtet kur komisioni i Reformës Zgjedhore ka mbaruar mandatin, ne si mazhorancë kemi detyrim ligjor të paktën të adresojmë 3 vendime të Gjykatës Kushtetuese sepse janë të detyrueshme. Vota e diasporës, për këtë mazhoranca ka përgatitur 1 projektligj qëë adreson ndryshimet në Kodin Zgjedhor për të identifikuar dhe adresuar boshllëqet që sipas Gjykatës Kushtetuese nuk kanë qenë të adresuara. Që janë: ku do llogaritet vota në çdo qark? Vota e secilit qytetar do llogaritet në qarkun ku ai është rezident. Diaspora ka kërkuar të lehtësohen procedurat e regjistrimit si votues nga jashtë. Kemi bërë që nëpërmjet teknologjisë regjistrimi të jetë automatik dhe në gjendjen civile. Një qytetar do deklarojë adresën ku jeton dhe automatikisht do regjistrohet. Ne themi që këto modalitete që duhet t’i adresojë KQZ, shteti merr përsipër t’i dërgojë me postë materialet zgjedhore dhe zgjedhësi është i lirë të votojë kë të dojë. Votat vijnë në Shqipëri deri ditën e zgjedhjeve dhe numërohen në qarqet përkatëse. Kemi vënë edhe afate”- u shpreh Gjiknuri.
Ai bëri thirrje që opozita ta votojë projektligjin që duhet të kalojë brenda këtij muaji, për t’i dhënë Komisionit Qendror të Zgjedhjeve, kohë që të përgatisë kushtet për realizimin e këtyre zgjedhjeve. Versus.al
