SPAK ka dërguar një letërporosi në Britani të Madhe ku kërkon të informohet për udhëtimin e çiftit Ilir Meta dhe Monika Kryemadhi dhe shkollimin e fëmijëve të tyre.
Kështu u shpreh gazetarja e kronikës, Anila Hoxha në “Breaking” ku bëri me dije se është letërporosi e ngjashme me atë që SPAK ka dërguar në Qipro lidhur me gjurmimin e pasurive të Metës dhe Kryemadhit.
“Prokuroria e Posaçme Antikorrupsion ka dërguar së fundmi letërporosi edhe në Britaninë e Madhe për të marrë informacion shterues sa i takon shkollimit dhe udhëtimeve nga njëra anë të çiftit Meta dhe shkollimit të fëmijëve të tyre.
Është një veprim i kryer nga SPAK së fundmi siç ka dërguar letërporosi në Qipro, sa kohë ka përcjellë një informacion të vakët sa i takon lobimit me kompaninë qipriote dhe meqenëse informacioni ka qenë disi i cunguar, SPAK ka vlerësuar se duhet të komunikojë sërish bazuar në marrëdhëniet juridiksionale të shteteve përkatëse për të përfituar informacion”, u shpreh gazetarja ndër të tjera.
Së fundmi, Kryemadhi dhe Meta janë paraqitur në SPAK njëri pas tjetrit. Në të dalë, kryetari i Partisë së Lirisë Ilir Meta ka qenë tepër i ashpër me akuza ndaj kreut të Prokurorisë së Posaçme Altin Dumanit. Ndërsa sa i takon mundësisë që të jetë nën hetim pasuror për blerje të ndryshme të bëra, Meta u duk sikur e kaloi përgjegjësinë tek bashkëshortja e tij, Monika Kryemadhi duke thënë se ishte ajo që merrej me financat. Versus.al
