Kryebashkiaku i arrestuar i Tiranës, Erion Veliaj ka reaguar sërish në rrjetet sociale ku shprehet se nesër do të ketë mundësi të mbrohet në gjykatë pas një muaji në qeli.
Në reagimin e tij, ai nuk ngurroi të përdorte kritikat dhe fyerjet e zakonshme ndaj prokurorit Olsi Dado ndërsa e cilësoi arrestimin e tij si “grusht shteti” ndaj votuesve të Tiranës. Ai shkruan mes të tjerash se kërkesa për pendesën e tij, ngjante si një gjyq i viteve ’60 dhe jo i kohëve moderne.
Reagimi i plotë:
Përshëndetje miq,
Pas një muaji izolim, nesër do të rikthehem për të mbrojtur veten, familjen, por edhe çdo shqiptar, që beson se: Letrat anonime janë pjesa më e shëmtuar e regjimit që lamë pas e s’kanë vend në Shqipërinë moderne.
Shpallja “i dënuar” pa gjyq që në nisje, ndodhte në ditët më të errëta të ferrit komunist, por jo në një demokraci europiane. Hetimi i biografisë personale apo vetting-u i paligjshëm, si ky imi për 20 vjet, ndodhte vetëm në kohën e Sali Enverit, por jo sot në shek. XXI.
Kërkesa për pendesë ende pa akuzë, ngjan me gjyqet popullore histerike në vitet ‘60, por jo në 2025. Persekutimi i familjes nga një noter nga babi, me 5-a, pa meritë e pa ligj, ndërtues në konflikt interesi, nuk mund të jetë etaloni i Reformës në Drejtësi.
Lënia e kryeqytetit pa drejtim nga i votuari i njerëzve me një të rënë të lapsit është, në mos grusht shteti, grusht ndaj qytetit, punëve të tij dhe votuesve të Tiranës. Shteti me “Uacap” në ditë pushimi, nga militantë të zellshëm të Saliut, sot hetues të Olsit, është fyerje ndaj reformës ku besuam të gjithë.
Trajtimi i sipërmarresve si “kulakë” dhe përgjimi i njerëzve të biznesit pa fakte, i përket Shqipërisë së pas luftës, jo të demokracisë. Presioni ndaj dëshmitarëve, duke iu kujtuar burgun, prindërit e fëmijët, u përket xhelatëve të një regjimi, jo demokracisë.
Prezumimi i pafajësisë është detyrim për standard Europian, dhe jo histeri kolektive e banaqeve, portaleve dhe kundërshtarëve që me votë i mundëm 7 herë në Tiranë, e veç me dhunë mund të na heqin nga fushata. Më shumë do të them nesër në seancë!
Shpresoj të jeni mirë! Kush po agjëron, e pastë sa më të lehtë, e kush më ka menduar e më ka mbajtur në lutje, Zoti ju bekoftë!
Më herët GJKKO i ka rrëzuar Veliajt kërkesën për kthimin e celularit të sekuestruar në momentin që agjentët e BKH e shoqëruan fillimisht në ambientet e Bllokut të Sigurisë. Për "fatin" e Veliajt nesër, do të vendosë gjyqtari Engert Pëllumbi i njëjti që dënoi ish-ministrin e Brendshëm Saimir Tahiri dhe caktoi masën "detyrim paraqitje" për Berishën pasi ky i fundit u lirua nga arresti shtëpiak në nëntor të vitit të kaluar. Versus.al
