Tiranë- Gjykata e Posaçme ka konfiskuar pasuri me vlerë 1 milionë euro në emër të Redjan Rrajës, të dënuarit me burg përjetë për atentatin ndaj ish-prokurorit Arjan Ndoji në Durrës, ku vdiq shoferi i tij Andi Maloku.
Pasuritë e sekuestruara rezultojnë të jenë nën emrin e Redjan Rrajës, gruas së tij Marsela Çiço dhe modeles Kejvina Kthella me të cilën Rraja kishte pasur lidhje.
Në listën e pronave të sekuestruara rezultojnë dyqane, apartamente, automjete dhe një orë “Rolex”. Konkretisht janë sekuestruar:
Dyqan me sipërfaqe 30 m², në emër të Redjan Rrajës
Apartament me sipërfaqe 76 m², në emër të Redjan Rrajës
Apartament me sipërfaqe 127.5 m², në emër të Marsela Çiços
Dyqan me sipërfaqe 18.09 m², në emër të Marsela Çiços
Dyqan me sipërfaqe 18.09 m², në emër të Marsela Çiços
Një automjet në pronësi të Redjan Rrajës
Një automjet në pronësi të Kejvina Kthellës
Një orë dore (Rolex)
Pasuritë me vlerë deri në 1 milionë euro i kalojnë shtetit dhe i dorëzohen Agjencisë së Administrimit të Aseteve të Sekuestruara dhe Konfiskuara për menaxhim.
Ngjarja për të cilën u dënua Redjan Rraja ndodhi më 1 nëntor të vitit 2019 pranë mbikalimit të Shkozetit. Asokohe Ndoji i cili ishte prokuror në Durrës rezulton të ketë qenë në makinë me Landi Muharremin, i njohur ndryshe si “ forti i Sukthit” dhe automjeti drejtohej nga shoferi i tij Andi Maloku.
Ndaj tyre u qëllua me breshëri automatiku nga një tjetër automjet dhe për pasojë shoferi Maloku humbi jetën, ndërsa prokurori Ndoji mbeti i plagosur. Vetëm 4 ditë pas ngjarjes së ndodhur, më 5 nëntor u arrestua në Shkodër Redjan Rraja pasi ekspertiza gjeti shenjat e gishtërinjve të tij në atentatin ndaj ish-prokurorit. Pavarësisht se e ka apeluar vendimin, Gjykata e Posaçme ia ka lënë në fuqi dënimin e përjetshëm. Versus.al
