Ditën e sotme në orën 08:30 të mëngjesit dalin para Gjykatës së Posaçme, i “forti i Shkodrës” Safet Bajri, vëllai i tij Behar Bajri dhe Asmer Bilali ndaj të cilëve u lëshua masë sigurie të premten nën akuzën e vrasjes së Fatbardh Licit në vitin 2018.
GJKKO pritet të konfirmojë masat e sigurisë të caktuar për kreun e grupit Bajri dhe 2 të arrestuarit e tjerë.
Safet Bajri mbërriti në ambientet e bllokut të sigurisë, të premten e 21 shkurtit ku u shfaq i buzëqeshur para kamerave të gazetarëve. Mësohet se ndaj tij po kryhen hetime edhe për përfshirjen e mundshme në atë që njihet si “masakra e Dobraçit” e ndodhur më 30 tetor të 2024 ku u vranë 4 persona.
Dy ditë para se të arrestohej, Bajri doli në një emision televiziv ku pretendoi se nuk kishte asnjë lidhje me ngjarjet për të cilat e akuzonin dhe emri i tij përmendej shpesh në media. Madje ai edhe “lavdëroi” punën e policisë për hetimin e ngjarjeve kriminale. Ndërsa pas këtyre deklaratave, me urdhër të SPAK, RENEA shoqëroi Bajrin drejt ambienteve të policisë. Versus.al
